Parkeringshuset: Kommunen konkluderer og signerer

Parkeringshuset som skal byggast på grusplassen ved Os ungdomsskule kunne hatt byggestart på forsommaren.

I staden blei det ein runde med innsyn som resulterte i klage på anbodsprosessen.

KOFA gav klagar medhald, men no har ekstern konsulent konkludert med at anbodsvinnar, Åsane Byggmesterforretning, er kvalifisert.

Bjørnafjorden kommune har bestemt seg for å signera kontrakt.

– Det blir kontraktsavklaringsmøte i neste veke, fortel prosjektleiar Frankie Taule Gindl.

Tilbydar har utvida vedståelsesfristen i samband med klagerunden, så vilkåra står ved lag.

Byggetida er sett til 8 månadar, prisen er 39 millionar kroner eks mva.

Det betyr at, med byggestart før jul, vil parkeringshuset stå klart til bruk rett over sommaren 2021.

Resultatet av den nye vurderinga:

• Donar AS er avvist frå konkurransen på grunn av manglande oppfylling av kvalifikasjonskravet om miljøleiingssystem.
• Konsulenten har konkludert med at ÅBF sitt kvalitetssikringssystem ikkje er identisk med ISO 9001:2008. Det har ein annan struktur, men når samla sett terskelen for eit likeverdig system.
• På kommunen si heimeside kan du lesa vurderinga av kvalifikasjonane og klagen.

154 plassar

Parkeringshuset skal få 154 parkeringsplassar.

Fotballbanen får eit kunstgrasdekke på 39,4 x 60,67 meter. Ein niarbane skal ha 40-50 x 58-60 meter pluss tryggleikssone.

Kunstgraset skal vera granulatfritt utan innfyll.