Påske + vinterferie = ein god idé?

To veker med ferie er over og kvardagen er i gang igjen. Ingen Midtsiden har snakka med synest dette var noko vi treng å gjera igjen, mange har også tapt pengar på endringa.

Det var få diskusjonar eller protestar då Os kommune vedtok skuleruta, som slo saman feriane, på tampen av 2014.

Men kvifor blei feriane slått saman?

– Vi i Os kommune har som tradisjon å følgja skuleruta i Bergen. Årsakene er fleire, ikkje minst det at fleire familiar i Os har ungar både i skulane i Os og Bergen. Men også Skyss speler inn her, med skuleruter og ferieruter, fortel rådgjevar innan oppvekst og kultur, Knut Vidar Garlid i Os kommune.

Bergen kommune argumenterte med at det, grunna tidleg påske, berre ville bli to skuleveker mellom vinterferie og påskeferie, og derfor var best å slå dei to saman. Kanskje kunne det gje betre vilkår for familiar som ville til Syden i ferien, òg?

– Dette er ein diskusjon vi ikkje tok del i. Forslaget frå Bergen likte vi ikkje så godt, men vi reknar med at det ville vore fleire som fekk det vanskeleg om vi hadde ulik ferie som nabokommunen i nord, seier Garlid.

– Pedagogisk ugunstig

Ein som i si tid gjekk imot å følgja Bergen kommune var rektor ved Os ungdomsskule, Kåre Lutro.

– Éin ting er at sommarferien er lang, men då er det eit opphald mellom to klassetrinn. Å ha to veker samanhengande fri midt i ein viktig læringsperiode er uheldig.

– Eg trur dessutan at dette har vore krevjande for fleire foreldre. Eg har ikkje fått tilbakemeldingar i nokre av retningane, men når eg spør kva dei synest om dette så er det ingen som ønskjer at det skal vera sånn fleire gongar.

Stor nedgang for Osbadet og Eikedalen

Både Osbadet og alpinanlegget nærmast Os, Eikedalen Skisenter, tapte pengar på ordninga.

– Vi hadde 75 prosent nedgang om vi samanliknar vinterferiane i 2016 og 2015. Vêret og øydelagt stolheis spelte òg inn, men dette var ikkje bra for oss, seier Fredrik Tønjum.

Han har framleis ope og held på å skifta den øydelagte delen i stolheisen. Han reknar med ei strålande helg med sol og alle heisar i drift, og trur denne helga blir sesongens siste.

Osbadet var spent på korleis vinterferien skulle bli, og fekk den nedgangen dei frykta.

– Det er gjerne grenser for kor mange gongar du går på kino eller ein tur og badar i løpet av to veker. Vinterferien plar vera god ogviktig for oss, i år blei det for mykje samanhengande fri, i tillegg mista vi ein fridag i og med at 2. påskedag blei innlemma i vinterferien.

Hadde liten effekt på Syden-salet

Sjølv om Voss og Myrkdalen hadde sambygdingar med vanleg vinterferie i veke 9, og utanlandske turistar frå Danmark og England med vinterferie før og etter, merka også andre i fjellheimen negativ effekt av at bergensarne fekk vinterferien fire veker seinare.

Ei av verksemdene som kanskje kunne tent på to veker med skulefri var Travelnet Os Reisebyrå, men slik blei det ikkje.

– Mange med ungar i baneskulealder plar uansett ta ungane fri ei veke før eller etter påske og ta to veker på Kanariøyane. Salet blei for vår del ganske likt, bortsett frå ein familie som reiste litt lengre, kanskje grunna den lange ferien, og tok seg eit cruise frå Dubai, fortel Jelena Lunde.

Tilbake til normalen i 2017

Ifølgje skulruta for Os kommune i 2016-2017 er vi tilbake til normalen neste år.

Vinterferien er frå måndag 27. februar, i veke 9 (siste skuledag før ferien er fredag 24/2), påskeferien startar måndag 10. april, i veke 15 (siste skuledag før påskeferien er fredag (7. april).

Haustferien er i år i veke 41, frå måndag 10. oktober.

Her kan du sjå heile skuleruta for 2016-2017 (oskommune.no).