Picapoint veks, flyttar inn i Lidl-lageret

Bildeserie:

1 av 3

Sidan starten i 2008 har Bjørn Stian Bjoarvik og Ingerid Helle Soltvedt opplevd ei god auke med reklamebyrået Picapoint i Jordmorsvingen. No er det fire personar-store reklamebyrået på jakt etter fleire tilsette og på flyttefot.

– I løpet av åra har vi hatt ei jamn og stabil omsetningsauke med kundar i heile Norden.

– Oppdraga står i kø, så vi har gode, men travle og lange dagar for tida, fortel Bjørn Stian Bjoarvik.

Bransje i enorm utvikling

Hovudfokuset og satsinga har dreid seg meir og meir over på digital marknadsføring, kor dei no òg søkjer etter meir kompetanse.

– I denne bransjen skjer ting så utruleg fort. Er du ikkje på hogget og brukar ressursar på å oppdatera deg på konferanser og kurs blir du fort utdatert. Difor er vi heile vegen vore opptekne av å vera til stades der nye trender og løysingar har blitt presenterte, supplerer Ingerid Helle Soltvedt.

På kundelista står mellom anna NetNordic, Kulur barnehagar, Knarvik Senter, Røde Kors Hjelpekorps og MX Sport Holding og Sport Outlet med brørne Jan Frode og Tor-André Skeie i spissen.

Flyttar saman

Samarbeidet med Skeie-brørne, som òg har kjøpt seg inn på eigarsida i Picapoint, er noko av bakgrunnen for at reklamebyrået no flyttar saman med Sport Outlet/MX Sport i det gamle Lidl-lageret, no Reli Os AS.

Les òg: Skeie-brørne «flaggar» heim - blir første leigetakar i gigantlageret

– Dei er, som oss, i kraftig vekst og hadde eit behov for betre ryggdekning og nokon å sparra med på det som går på digital marknadsføring når eigne merkevarer som Elements og Vikafjell som skal byggast opp på landsbasis.

– For oss betyr det at vi får eit grunnlag og ein tryggleik for den auka satsinga. I tillegg kjenner vi Skeie-brørne godt frå før og veit at vi vil få eit godt samarbeid, seier Bjoarvik.

Sparar tid

Jan Frode Skeie fortel at dei ser fram til å koma saman med Picapoint.

– Den store gevinsten for oss er at vi kjem til å spara tid, spesielt med tanke på Sport Outlet kor vi skal ha ut marknadsmateriell i mange forskjellige byar i Noreg relativt hyppig.

– Vi har det i dag in-house, Stig Lund hos oss gjer mykje av jobben, men vi såg at vi treng hjelp til klargjering og kontakt med eksterne leverandørar, fortel Skeie.

Kan sitja kor som helst

Førebels er dei nye lokala i Ådnadalen ein byggeplass, men både Skeie, Bjoarvik og Soltvedt håper dei skal vera klare i løpet av sommaren.

– Vi kjem til å dela fellesfasiliteter som kantine og møterom, men ha kvar våre kontor. I tillegg får vi eit fotostudio i andre høgda som vi begge vil nytta, forklarar Solvedt.

– De blir ikkje langt utanfor allfarveg og vanskeleg for kundane å nå når de flytter ut her då?

– Nei, så lenge vi har breiband som fungerer som det skal, kan vi sitja kor som helst. Dei fleste av møta vi har med kundar tek vi via videomøter, elles er det mykje epost og telefon. Det er effektive møteformer som gjer at både vi og kunden sparer mykje reisetid.

– Så lenge vi har moderne lokaler og det vi treng av utstyr så klarer vi oss, avsluttar Soltvedt.