Piratsjåfør sperra inne

Dei siste 3-4 åra har mengda ulovleg piratkjøring auka kraftig, ifølgje Os Taxi.

– Medan enkelte tener store summar svart på å driva ulovleg passasjertransport har våre helgesjåførar stadig mindre å gjera på. Dette er dessverre eit problem som ser ut til å bli vanskeleg å kvitta seg med, seier formann i Os Taxi, Tor Anders Hauge.,

Les òg: Lei av piratkjøring (oktober 2009)

Fanga av drosjesjåførar

I helga tok drosjesjåførane sjølv tak i ein som henta passasjerar inne på haldeplassen.

– Han var innom haldeplassen fleire gongar og henta folk. Til slutt så ringte vi politiet, fortel ein av sjåførane som var på vakt denne natta.

Før politiet kom fram var piratsjåføren tilbake igjen. Då to drosjar kom til plassen prøvde han å kjøra frå staden, men dei to drosjesjåførane sperra vegen med bilane sine.

– Akkurat då kom politipatruljen, fortel ein av sjåførane.

Risikerer stor bot og inndraging av bil

Os Taxi reknar med at det er frå 5 til 10 piratsjåførar i sving kvar kveld i helgene og at desse kjører inn rundt 10.000-15.000 kroner kvar.

– Samla sett er nok dette millionbutikk for dei som held på. Samtidig er dette i travlaste tida for politiet, så eg forstår at det er vanskeleg å ta dei.

I fjor sommar hadde politiet ein aksjon retta mot piratkjøring. Dei opplevde eit noko mindre omfang, men fekk tatt nokre førarar.

Etter det Midtsiden kjenner til kan bøtene bli store, éin av dei so blei tatt fekk ei bot på 13.000 kroner.

– Vi følgjer med og om dette er eit problem som aukar igjen så kjem vi til å utføra nye aksjonar, seier politioverbetjent Terje Sperrevik.

– Dei som blir tatt risikerer store bøter, avskilting av bil og til og med inndraging av bil, anten det er pappa sin bil eller ikkje, legg han til.

Om det skulle skje ei ulykke medan føraren har ulovlege passasjerar om bord står føraren endå verre stilt.

– Ungdomen bør finna andre måtar å tena pengar på. Piratkjøring er straffbart og straffa kan koma til å svi skikkeleg, åtvarar Sperrevik.