Premierer gode kundar

Laurdag lanserte Oseana vårprogrammet med matinékonsert i Griegsamlinga. Samstundes lanserte arrangementssjef Berit Steen huset sitt eige medlemskort.

- Vi har sett at vi har eindel faste publikummarar som er på veldig mange av arrangementa våre. Dei har vi lyst til å gje noko ekstra til. Difor har vi no fått laga eit medlemskort for Oseana, fortel Berit Steen.

Kortet som gjeld for eitt år av gangen kostar 250 kroner og gjev rabattar på ei rekkje arrangment og utstillingar.

- Med kortet får du halv pris på utstillinga i Griegsamlinga.

- I tillegg får du minst 25% rabatt på dei fleste av dei arrangementa kor vi sjølve er arrangørar, forklarar arrangementsjefen.

Berre dagar etter at kortet blei lansert har fleire nytta seg av moglegheita til å få billegare billettar.

Må kjøpas i resepsjonen

Steen forklarar at dei arrangementa kor det er mogleg å få rabatt er merkt med at medlemskortet gjeld på heimesida til Oseana.

- På eitt medlemskort kan ein kjøpe inntil 4 billettar til rabatterte prisar.

- For å få rabatten må ein koma i resepsjonen her på huset. Det lar seg diverre ikkje gjera å kjøpe billetter på andre stader, som til dømes billettservice og få rabatt.

- Bergen Live, til dømes, har ei ordning der medlemmar får moglegheit til å kjøpa billettar til populære arrangement før billettsalet opnar for ålmenta. Har de tenkt å gjere det same?

- Vi vil gå litt forsiktig fram no i starten, men det er klart at vi ser på moglegheitane for korleis medlemmane kan få enda større fordelar av å vera med.

- I første omgang tek vi sikte på å få på plass eit nyheitsbrev som gjer at dei i allefall får informasjon tidleg om arrangement som er på trappene, avsluttar arrangementssjef Berit Steen.

Første anledning til å oppnå medlemsrabatt er allereie til helga når barnerockemusikalen "Heavykatten" vitjar Oseana.