Greidalen, tunellen til Ohara og det komande bustadområdet over Tellevika sett frå lufta. (Foto: X Bolig AS for SANDS)

Pris: 50 millionar kroner

Denne tomta blei lagt ut for sal i dag.

Av: Kjetil Vasby Bruarøy

I samband med bygging av nytt hovudreinseanlegg for kloakken i Os, har Os kommune både laga veg ned til sjøen, og lagt til rette for bustadbygging på ei 21,4 mål stor tomt mellom Kuhnle og Tellevika.

• Les òg: Nytt bustadfelt i strandsonen

I dag blei utbyggingstomta lagt ut for sal.

I den opne marknaden

Det er kommunestyret som har vedtatt å legga eigedomen ut for sal i den opne marknaden.

– Det blei fatta eit prinsippvedtak, og vedtaket sa òg at eigedomen skulle ut på den opne marknaden, seier rådmann Christian F. Fotland.

Kommuneadvokaten, Advokatfirmaet Steenstrup Stordrange DA (SANDS), har oppdraget.

– Os kommune har bestemt å ikkje regulera denne sjølv, at kjøpar like godt kan ta dette arbeidet. Dermed er prosessen frå kjøp til bygging noko meir tid- og kapitalkrevjande, noko som igjen vil gjera at det er litt færre aktuelle kjøparar, seier advokat Åshild Fløisand hos SANDS.

– Samtidig er lista ganske lang over utbyggarar som er store nok til å handtera dette, og eg vil tru at eit så sentrumsnært utbyggingsområde heilt i fjøresteinane vil bli sett på som attraktivt.

Kva med Tellevika?

Os kommune har tilrettelagt med veg og gangveg rundt det komande bustadområdet og ned til Tellevika, der det òg er opning og lastebilveg inn til Ohara-hallen og vidare opp på Moberg.

Bustadtomta inneheld ikkje sjølve badefjøra, men som del av tilbodet skal dei som ønskjer å kjøpa tomta laga eit enkelt forslag til tiltak i Tellevika som kan auka verdien på fjøra som friluftsområde.

– Tellevika blir framleis offentleg areal, og forslaga skal handla om å gjera Tellevika meir tilgjengeleg, men gjerne òg meir attraktiv. Forslaga kan vera alt frå parkeringsplass og toalett til gangveg, benkar og stupebrett. Ei oppgradering av Tellevika vil naturlegvis òg vera med på å gjera det komande bustadprosjektet meir attraktivt, seier Fløisand.

Eigedomen er lagt ut med tilbodsfrist 14. desember, og med visse krav til kjøpar.

Du kan lesa meir om eigedomen i annonsen på Finn.no.

Fleire saker