Prøvekjøring av to raske Askeladdar

Bildeserie:

1 av 16

Onsdag 12. mars blei Askeladden C75 Cruiser og Askeladden C75 Center Cabin lansert på båtmessa Sjøen for Alle i Oslo.

– Båtane fekk mykje merksemd og cruiseren blei nominert til årets båt, fortel Jonathan Dyrstad.

C75, daycruiseren og modellen med hytte i midten, er teikna av Gasper Peternelj, som også står bak Askeladden Commuter 11 og Z8.

– Mange hadde nok venta størst interesse for Cruiser, men trass i at vi har hatt Pilot House-serien i marknaden i mange år, er det like stor interesse for Center Cabin.

Med Center Cabin får du frekkare linjer og høgare fart, frå 33 med Pilot House til over 40 knop med Center Cabin.

46 knop - med feil propell

Dei to nye modellane, som har identisk skrog, er med djup v-botn og hekk som tåler påhengsmotor på 300 hestekrefter, bygd for høg fart.

Båtane Askeladden Boats har i brygga på Askvik er utstyrte med 300 og 250 hestekrefter. Begge motorane er 4-liters V6 firetakt med Suzuki sin nye Lean Burn-teknologi.

Midtsiden cruisa gjennom ferjebølgjene i Korsfjorden, runda ferja og fekk C75 Cruiser (med 300 hk) opp i 46,0 knop.

– Vi held på med testkjøring no og kjem nok til å vinna 2-3 knop til når vi har funne rett propell, trur Jonathan.

Kompakt og lydlaus

Ingenting rasler eller lager uønska lyd gjennom ferjebølgjene. Powertrimmen står på over 90 prosent og av gamal vane tar vi motoren litt ned før vi testar ein litt krapp sving i over 40 knop.

– Det der treng du ikkje. Det skal mykje til for at han suger luft.

Vi tok av litt på gassen. Er vi i marsjfart no? Nei, framleis over 40 knop. Vi drar av meir, til det kjennest ut som om vi er i ferd med å ta båten av plan. Det viser 33 knop på fartsmålaren.

– Dette er fin marsjfart. Du når langt på kort tid, med lite drivstoff, og det er veldig lite støy frå motor og vind. Bruker du flaps kan du sikkert ta båten ned under 20 knop og framleis ligga på plan, seier Jonathan.

Godt med utstyr – smarte løysingar

Begge dei to demobåtane har godt med utstyr. Vannskikrok, kjøleskuff, trykkvatn og dusj.

Ein av dei nye, smarte løysingane er pantryen i C75 Cruiser, der du med eit lett grep vrir ein brennar opp ved sidan av vasken framfor passasjeren framme. Som eit hanskerom som blir forvandla til eit kjøkken.

Også i C75 Center Cabin er plassen godt utnytta. Her ligg pantryen under ein benk bak førarposisjonen. Center Cabin har også vask inne i cabinen, her treng du ikkje ut på dekk for å pussa tennene og ta natt.

Dyrstad ser for seg at dei fleste båtane blir produsert med topline-pakke, men at du i tillegg kan bruka opptil rundt 200.000 på tilleggsutstyr som ankervinsj, baugpropell og stereoanlegg.

Erstattar ingen av dagens modellar

Askeladden Boats held på heile P-serien sjølv om Center Cabin no kjem inn som eit raskt og linjelekkert alternativ, litt i same gata, men meir retta mot fritidsmarknaden.

Også C62 blir verande i produksjon. C75 Cruiser er berre tre fot lengre, men med største motor og toplinepakke blir båten cirka 250.000 kroner dyrare enn ein C62 med 150 hk til rundt 440.000 kroner.

Det ligg også i korta at sjansen er stor for at det kjem fleire nye Askeladden-modeller i C-serien.

Askeladden C75 Cruiser

Tekniske data:
L: 7,45 m inkl. plattform
B: 2,55 m
W: 1.600 kg
V bunn: 25˚
Motor: Suzuki DF150 – DF300 XL rigg
Tank min. 230 L
Vann: 40 L
Septik: 40 L

Toplinepakke:
• Vannskikrok
• Spyletoalett med septiktank 40 L
• Trykkvann, vask, pantry og dusj badeplattform
• Kjøleskuff 30 L
• Pantry
• Trimplan
• Dekksluke

Askeladden C75 Center Cabin

Tekniske data:
L: 7,45 m inkl. plattform
B: 2,55 m
W: 1.650 kg
V bunn: 25˚
Motor: Suzuki DF150 – DF300 XL rigg
Tank min. 230 L
Vann: 40 L
Septik: 40 L

Toplinepakke:
• Spyletoalett med septiktank 40 l
• Trykkvann, vask, pantry og dusj badeplattform
• Kjøleskuff 30 l
• Pantry med kokeapparat
• Trimplan
• Dekksluke fordekk
• Skyveluke hard top
• Teakstyle dørk i senterkabin og forkabin