Pryder 20.000 omslag

Alle dei vidaregåande skulane i Hordaland blei inviterte til å senda inn bidrag i konkurransen om å få pryda omslaget til fylket sin inntakskatalog for skuleåret 2012/13.

Ei av dei som tok utfordringa var Susann Rosvold frå Os. Susann går andre året på studiespesialisering med formgjeving ved Fusa vidaregåande skule.

- Det var eigentleg læraren vår i faget "trykk og foto" som gav oss oppgåva å laga forslag, så kunne vi sjølv få bestemma om vi ville senda det inn, fortel den unge kunstnaren.

60 bidrag kom inn og gjennom ei utveljing der eitt og eitt bilde forsvann ut sto juryen til slutt igjen med Susann sitt bilete.

Leika seg i Photoshop

Vinnarbidraget er eit relativt enkelt kvitt bilde med fargefulle strekar.

- Eg sat og leika meg med ein masse lynnedslag i photoshop.

- Endra litt på fargane, strekte litt i deg og dusa norkre av dei før eg endte opp med det ferdige bildet, forklarar Susann.

- Tok det mange klassetimar?

- Nei, seier ho med eit smil.

- Det blei gjort som ei relativ rask heimelekse.

Ope for tolkningar

Då juryen skulle kommentera vinnarbildet omtala dei det med at det passa til våren og lurte på om det var kunnskapens greiner ho hadde illustrert.

Sjølv held ho på tolkninga av lyn.

- Eg synes det symboliserer vala ein må ta. Kva veg ein skal gå.

- Du må finne din veg og det som passar det, men samstundes symboliserar det at lynnedslaga er fletta inn i kvarandre, at det alltid går an å velja ein annan veg.

- Andre har kanskje ei anna tolkning, smiler ho.

Kva skal premien brukast til?

Susann vann konkurransen saman med ein annan Fusa-elev, Frode Sandvin. Dei to bidraga utgjer tilsaman både fram- og bakside på katalogen.

For innsatsen fekk dei to kvar sin premie på 4000 kroner.

- Kva skal du bruka pengane på, då?

- Dei kjem godt med. Eg er i ferd med å ta førarkort, så det blir nokre kjøretimar av 4000, avsluttar Susann Rosvold nøgd.