Pumptrack-planlegging ved hamna

Bildeserie:

1 av 3

I møte i arbeidsutvalet Liv på Øyro 2 i mars var prosjektsjef i Os kommune, Halvor Hanevik, på plass for å presentera idear som kan skapa aktivitet, særleg for ungdom, i Os sentrum.

Hanevik fekk grønt lys til å jobba vidare med prosjektet, der pumptrack er det store nye. I dag var leverandør på plass. Unisport leverer den originale modulbaserte pumptracken frå Parkitect, som er verdsleiande og prisbelønna.

– Du kan nesten ikkje finna ein meir nydeleg område for ein pumptrackbane, heilt ved sjøen og samtidig midt i sentrum, seier Oddbjørn Krohn Dalen frå Unisport.

Pumptrack er ein bane for sykkel, sparkesykkel, skateboard og rulleskøyter - ein installasjon som kan stå permanent eller demonterast og flyttast.

– Banane våre er stort sett frå 40 til 150 meter lange. Her ser eg for meg at vi kan bygga ein på 60 til 100 meter, alt etter korleis vi nyttar tomta.

Benkar, boccia og pumptrack

Det aktuelle arealet er parkeringsplassen nærmast Osbrua og gjestebrygga inst i hamna, kalla «trekant-tomta» av utvalet.

Popup-parken, som opna i juni i fjor, måtte fjernast mens Ohara-leidning blei lagt i pumpehuset, eit arbeid som nesten er ferdig.

– Parken med benkane skal opp igjen, men i ei litt anna form. I tillegg har vi 500 kvadratmeter til boccia og pumptrack, fortel Hanevik.

– Kor tid skal dette stå ferdig?

– Vi er på veg for å diskutera leveringsvilkår no, og det blir nok sommarferie før banen blir montert. Men vi ønskjer å få det på plass så snart som mogleg.

Tryggleik og parkering

På same måte som skateparkar er det ikkje krav om mjukt fallunderlag rundt banen. I Os kan den monterast rett på dagens asfalt, men med ein viss avstand til lyktestolpar, blomsterpotter og andre ting som er uheldig å møta på veg ut av banen.

– I tillegg vil vi montera bom for å redusera risiko for at folk kjem inn eller ut av området i høg fart. Dei skal få leika seg inne på banen, men vi vil hindra at dei skal koma susande ut av banen, full i adrenalin, og rett ut på parkeringsplass eller fortau.

Det er politisk vilje til å ofra 20 parkeringsplassar, i alle fall sommarhalvåret, til aktivitetsskapande installasjon.

– Behovet for parkeringsplassar er lågare om sommaren. Når vi kjem til hausten får vi gradvis fleire plassar andre stadar, når den gamle brannstasjonen er riven og, noko seinare, nytt parkeringshus på grusbanen er ferdig. Denne aktivitetsparken ved hamna kan kanskje, om den blir ein suksess, bli ståande.

I fjor sommar var det lagt til rette for bubilar på plassen. Desse plassane er erstatta ved Vognhallen, der straumuttak òg har kome på plass.