Råkkar opp kafeen

Bildeserie:

1 av 4

Marete Lund Bakke, som bur i Lysefjorden og tidlegare har jobba som bartendar og servitør ved Kafé Ole B, fekk ein idé for kafeen i slutten av juli.

- Eg ville rocka opp puben i kafeen til Reidar litt, og tenkte at med det levande rockemiljøet vi har i Os, og alle dei framleis aktive rockeveteranane vi har i Lysefjorden, burde få til eit opplegg, seier Marete.

Breitt samarbeid
Marete kontakta Kjetil Grønvigh og Kjell Engelsen Moberg frå Os Rock City, og Andreas Lindborg frå Søfteland Rock n LOL.

- Dei har vore veldig engasjerte og hjelpsame, og både støtta ideen og kome med materiell av den typen eg har byrja å samla på.

Puben er dekorert med gamle avisutklipp, platecover og konsertplakatar, og ein del effektar, som t-skjorter og instrument.

Bart-konsert og jam
Fredag er det opningsfest for "Råkk Kafé Ole B", og sidan det allereie er over 120 som har meldt seg på, er det ikkje berre loftet som blir tatt i bruk.

- Dette er eit glimrande initiativ, og sidan det ser ut til å bli fullt hus får dei bruka heile kafeen, seier innehavar Reidar Engelsen.

Festen startar med Bart-konsert klokka. Etterpå skal Kjetil Grønvigh sitt nye band, Warfart, debutera. Og så blir det jam.

- Det gjeld å koma presis, for Bart startar klokka 21, og dei vil du ikkje gå glipp av. Dei seier dei er "kinda like The White Stripes, but better lookin", og eg veit at dei er unik på å skapa stemning, seier Bakke.

Jammen kan også bli livleg, det er ikkje få rockarar på gjestelista.

- Seinare ser eg for meg arrangement rundt ein gong i månaden, men at puben på loftet av og til kan brukast som ein samlingsplass også når det ikkje er konsert, seier Marete.

- Noko for kvar krins!
Tore Bratseth driv butikken i nabolokalet på Buena kai, og er ein kjent rockeveteran i Os. Han er framleis aktiv som musikar i banda Bombers og The Batallion.

- All fritid går med til musikk, seier Tore, på dagen 10 år etter at han blei kjøpmann.

Han har gjeve frå seg fleire relikviar til innreiing av puben i nabolokalet, og er glad for initiativet i rockekrinsen Lysefjorden.

- Det er kjekt at det skjer noko slikt på heimebanen vår, og eg synes det er veldig bra med alle banda som blir starta rundt om i kommunen.

- No får vi satsa på å ta krins for krins, ein råkkekafé i Øyane hadde også vore tøft, seier Tore og ler.