Reint osablod
Til helga møtast fire av Noregs beste 16-årslag i Oshallen. - Eg er stolt av at vi stiller eit lag med berre jenter frå Os, seier trenar Kenneth Husebø.
Laurdag og sundag får handballjentene til Os vitjing av Fjellhammer, Sarpsborg og Follo HK Damer Elite til serierunde i den nasjonale Bringserien.
- Kvalifiseringa i år var tøffare enn i fjor med eit trangare nålauge for å koma med, så det er berre gode lag som er med i serien.
- Vi går for seks poeng på heimebane, men veit at det er tøff motstand vi møter, seier trenar Kenneth Husebø.
Jentene frå Os
For å klare kvalifiseringa til den nasjonale serien er det mange lag som slår seg saman og som inngår partnerskap for å få dei beste spelarane i distriktet på same lag.
- Eg tykkjer det er litt synd at det har blitt slik og er difor litt ekstra glad og stolt over at vi stiller eit reint Oslag.
Riktig nok har ikkje jentene spelt på same lag heilt frå dei byrja med handball. Nokre har trådd barneskoa på Nore Neset, andre på Kuventræ, men dei siste åra har jentene spelt saman.
Veit lite om laga
Husebø har ikkje brukt mykje tid på å studera dei tre motstanderane.
- Dei får eg ikkje gjort noko med like vel.
- Fjellhammer er vel tippa som ein av favorittane i serien. Det er det eineste eg veit.
- Det eg har fokus på er våre eigne jenter. Det er spelet deira eg kan påverka, meiner Husebø.
Han stiller med full stall kor alle er friske og raske.
God erfaring frå senior
Fleire av jentene, som i hovudsak er fødd i 1996, har denne hausten debutert på seniorlaga til Os Turn.
- Vi har ei veldig bra bredde i stallen.
- Eg har faktisk eit luksusproblem når eg skal plukke ut dei som skal starta kampene, smilar Husebø.
- Det at fleire av dei speler 2. og 3. divisjon seniorhandball merkast godt. Dei er blitt mykje tøffare i ein mot ein situasjonane enn det dei til dømes var i fjor.
- No gjeld det berre å få det ut også i 16-årskampane.
Målet er slutspelet
I pulja til Os er det 16 lag, kor dei fire beste går til det nasjonale slutspelet i april.
- Målet er heilt klart å koma dit.
- Skal vi klara det bør vi ta seks poeng på heimebane, og det trur eg vi skal klare.
- Jentene er kjempetente og gler seg til å spela for ein fullsatt oshall, så det er berre å ta pause frå TV-skjermen og EM-handball og komma seg opp i hallen, oppmodar trenaren som lovar fartsfylt handball med nokre av dei beste jentene i 16-årsklassa i Noreg når dei tek imot dei tre austlandslaga.
Etter første runde kor Os møtte Røyken og Hurum, Just og Hinna står Os med fire poeng og ligg på femte plass. Husebø satsar på å ta steget oppover på tabellen etter heimerunda i helga.