Bjørn «Bosse» Sigurjonsson kan saman med kona, Hanne Hansen, sjå attende på ein god vinter. Konditoriet og musikkbaren i Brugata er no klare for våren. (Foto: Kjetil Osablod Grønvigh) 

Rekordvinter hos Hanne's

Vårprogrammet nesten spikra: God start på året for Hanne’s - både på scenen og på kjøkkenet.

Av: Kjetil Osablod Grønvigh

– Helga som kjem no, er ei typisk helg kor vi ventar mykje folk. Fredagen har vi besøk av dei legendariske De Musikalske Dvergene, og på laurdag er vi vertskap for eit nytt moteshow i regi av Dysvik Clothing, Duga, Moberg Sko og Tiny.

Dette fortel Bjørn «Bosse» Sigurjonsson, som saman med kona Hanne Hansen er drivarane av Hanne’s. 

– Det er i tillegg både stand-up og konsertar andre stadar i bygda, så vi vil nok sjå ein del ekstra kundar innom både fredag og laurdag, fortel musikk- og konditorgründaren dei fleste berre refererer til som Bosse. 

Skummel start vart til rekord

Bosse fortel om ein bra vinter i Brugata, med ei romjul som gav fleire fulle hus.

– Både Kivi og Johny Olsen Band trekte særs godt med folk. Det er tydeleg at osingane veit å setja pris på sine lokale heltar. 

Fram til no i år har det vore god drift i utelivsbiten, fortel Bosse. 

Men konditori-delen baud på ei overrasking.

– Vi trudde at januar og februar skulle vera heller rolege, og to veker ut i januar såg det heile litt skummelt ut, det innrømmer eg. Men så berre eksploderte det.

– Dette, saman med gode tal i musikkbaren, har gjeve oss ei rekordomsetnad for februar. Vi byrjar å få oss eit godt rykte, både som spelestad og som konditori. Spesielt vil eg trekkja fram responsen vi har fått på snittane vi produserer - dei fell i smak der ute.

Held oppe trøkket - òg med trekkspel

Mykje av programmet for våren er allereie klart for Hannes’s.

Etter at dei kortvokste musikarene frå Bergen har vore på besøk, held mars fram med Howlin’ Jukes, Biggen og Landstrykeren og Bris. Vidare utover våren vert det jam kvar fredag, noko Bosse er glad for å kunna husa;

– Eg er oppteken av at det skal vera ein scene i Os som «kven som helst» kan stiga opp på. Det er samstundes ein effektiv måte å få sjekka ut band og artistar som lurar på om dei kan få spela hos oss. Då plar eg be dei stikka innom på ein jam, så får eg høyrt dei der først før vi eventuelt vert einige om ein spelejobb hos oss.  

Kivi, Camp David og Papaslide er alle kjende namn i Os-bygda si musikalske historie. Desse kjem alle til Hanne’s før sommaren.

– Desse veit vi trekk godt med folk, men vi kjem òg til å tilby nye artistar for Os-publikummet. Mellom anna får vi besøk av plateaktuelle Malene Markussen i april. 

Ein og annan platesnurrar skal òg innom Brugata i løpet av våren og i påsken vert det ein heilaften med 80-tals hardrock og metal frå høgtalarene.

På den heilt andre sida av skalaen vert det òg rom for trekkspel-musikk og dans når trioen Arvid Engegård (fiolin), Håvard Svendsrud (trekkspel) og Svein Haugen (bass) kjem attende for å by opp til dans. 

Fleire saker