Rema 1000 har leigd butikklokale i Idrettsvegen sidan august 1989. I løpet av 2018 må dei ut. (Foto: Kjetil Vasby Bruarøy)

Rema 1000 må ut av Idrettsvegen

Etter nesten 29 år fekk dei ikkje fornya leigekontrakten.

Av: Kjetil Vasby Bruarøy

Rema 1000 region vest får ikkje fornya leigekontrakten med huseigar i Idrettsvegen, Dagfinn Askvik.

– Vi hadde ønskje om å fornya avtalen, men hadde oppgradering av bygget som element i forhandlingane. Det må nokre forbetringar til for å få lokalet opp til dagens standard, seier regionsdirektør Arild Remme.

Men forhandlingane resulterte i at Askvik sa nei til vidare leige frå 1. januar 2019.

Kor tett opptil 31. desember Rema kan halda ope er førebels uvisst.

– Overraskande og trist

Rema 1000 har hatt leigekontrakt sidan august 1989. Dei siste 27 åra er det Trond Hope og kona Ingunn som har eigd og drive dei to Rema-butikkane i Os, Trond Hope AS (Idrettsvegen) og Hope Handel AS (Kuven stasjon).

Trond Hope AS, som driv Rema-butikken, må ut av lokalet innan utgangen av 2018.

– Sjølv om det alltid er spennande med forhandlingar kom dette som eit sjokk! Det er trist, ikkje minst for våre tilsette, seier Trond Hope.

Måndag for ei veke sidan blei dei 14-15 tilsette informert.

– Fleire av dei har jobba her i 15-16 år. Dette var ein tung beskjed å få.

Ønskjer fleire butikkar i Os

Dei to Rema-butikkane er med 73,1 (Idrettsvegen) og 96,5 millionar (Kuven stasjon) i omsetnad i 2016 begge blant dei 20 største selskapa i Os. Sjølv om 2017 blei eit tøft år for Rema-kjeda klarte Hope å tena pengar i Idrettsvegen også i fjor.

– Om vi ser etter nytt lokale eller ikkje er for tidleg å seia. Vi skal uansett opna ein ny Rema-butikk i Kolskogen. Dette håper eg blir rundt opninga av E39 Svegatjørn-Rådal (vegen er venta å vera ferdig i 2022).

• Les òg: Hope blir kjøpmann i Kolskogen

– Kva med dei tilsette i Idrettsvegen, kan nokre av desse få jobb på Kuven stasjon?

– Det er òg for tidleg å seia. Vi er i utgangspunktet fullt bemanna, men vi veit ikkje kva året bringer, kva som blir siste opningsdag i Idrettsvegen eller kor mykje handel frå Idrettsvegen vi klarer å flytta til Kuven stasjon.

– Eg ville sikra daglegvaretilbodet for framtida

Huseigar Dagfinn Askvik avviser at brotet i forhandlingane handla om oppgradering av bygget.

– Vi har hatt dialog om dette i fleire månadar, og begge var innstilte på å dela på desse kostnadane.

– Men så halte det ut, det gjekk tid før eg høyrde frå dei, og så kom dei no og ville leiga i berre fem år vidare, seier Askvik til Midtsiden.

Om Askvik skulle ta investeringar på bygget ville han ha lengre avtale.

– Både for dei som soknar til denne butikken og dei som liker å stoppa på denne staden for å handla, er eg opptatt av at det skal vera butikk i dette lokalet.

Signerte med Norgesgruppen

– Eg blei usikker på kor langsiktig Rema tenkjer, derfor bestemte eg meg for å inngå samtalar med ein annan aktør.

No har han signert leigeavtale med Norgesgruppen.

– Dei har signert for 10 år med sjanse til å utvida med 10 til. Eg veit ikkje kva type butikk dei vil inn med, men eg reknar med at storleiken passar til ein Kiwi-butikk.

Lokalet på gateplan er i dag på rundt 1200 kvadratmeter, der 900 av desse er salsflate.