Sløkking av ulovleg bål i 2018. (Ill. foto: KVB)
Sløkking av ulovleg bål i 2018. (Ill. foto: KVB)

Rettar fokus mot ulovleg bålbrenning

Måndag skal brannvesenet ha møte med politiet - i går sløkte dei nok eit ulovleg bål.

Kjetil Vasby Bruarøy
21. mars 2020 - 10:52

Fredag klokka 20.40 rykte brannvesenet ut til Nore Neset på fleire meldingar om bål med tilhøyrande dårleg lukt.

– Det var eit ulmande bål på staden då vi kom fram, men ingen folk. Det lukta surt av bålet, og det var teikn til brenning av anna enn hageavfall, så vi sløkte det, fortel Espen Storum.

Storum er leiar for forebygging i Os brannvesen.

Politiet blei kontakta og følgjer opp.

Tryggleik og slurv

Generelt er folk flinke å varsla brannvesenet om dei skal brenna hageavfall. Det gir god informasjon i tilfelle avtstandsmelding om brann.

Men brannvesenet får òg ein del utrykking til bål der folk brenner andre ting enn hageavfall.

– Bålbrenning er regulert av tre lovar, brannloven, forureiningsloven og folkehelseloven (avfallshandtering). Det er for eksempel ikkje lov å brenna byggematerialar. Næringsaktørar har heller ikkje lov å brenna hageavfall.

– No til våren vil vi saman med politiet ut med ein informasjonskampanje, så folk veit kva som er greit og ikkje.

Bjørnafjorden kommune har dessutan sin eigen brannforskrift.

Frå 15. april til 15. september er det generelt bålforbod i kommunen, då er det slutt på brenning av hageavfall og berre greit med bål til grill og kos på eigne bålplassar.

I spesielt tørre periodar kan brannvesenet legga ned totalforbod mot bruk av open eld.