Retur gav opptur
Sælen selte 150 panner på to veker. – Det har blitt ei forbruksvare, seier Paul Hans Sælen.
Første halvdel av februar var det pannekampanje i Jernia-kjeden. Den lokale Jernia-butikken, Paul M. Sælen, har no bakgården full av brukte steikepanner og kasserollar.
– Vi har hatt sånne kampanjar to gongar før, men det har aldri vore liknande respons, seier Paul Hans medan han nesten vantru tømmer pose etter pose med panner opp i ein stor trekasse.
Panne-amnestiet gjekk ut på å levera inn brukte panner og få nokre hundre kroner i rabatt ved kjøp av ny.
– Det er kjeden som spanderer mesteparten av rabatten, og gjev oss varer til redusert innkjøpspris. I tillegg spanderer dei transport og retur av dei gamle, som går til gjenvinning.
– Forbruksvare
Det er ikkje med panner som med el-varer, at det er pliktig retur.
– Men varene og forbruksvanene våre er endra. Det er ikkje lenge sidan folk hadde same steikepanne og gryte nærmast livet ut, no er det ulike belegg, nokre som tåler stålredskap, andre ikkje.
– I tillegg kjem skifte til induksjon, som gjer at folk skifter panner som aldri før. Enkelte av kundane kom innom med 3-4 panner for å kjøpa nytt, fortel Sælen.