Med 40 meter lang djupvannskai kan Børrea og Solstrand no ta imot gjestar sjøvegen. I tillegg er det lagt til rette for vandring langs fjorden. (Foto: Kjetil Vasby Bruarøy)

Robust, røff og linjelekker

120 år gamle Solstrand Hotel & Bad har endeleg fått ny front mot fjorden. I juni legg Statraaden til land på den nye kaien.

image
image
image
image
image
image
image
image
image
image
image
image
image
image
image
image
Av: Kjetil Vasby Bruarøy

Den gjorde nytten i 98 år, kaien som hotellet no har fått erstatta med noko som både gjev rom for både staseleg besøk og for fredfulle vandringar langs eit av hovudelementa hotellet har hatt som trekkplaster i 120 år; fjorden.

– Vi set pris på grunnelementa, lys og vatn, utsikta mot den opne landskapen, mot rein, norsk natur. Det er lett å ta det for gitt for oss som bur her. Våre gjestar frå ulike nasjonar minner oss heldigvis ofte på verdien av det vi har å by på, seier Børrea Schau-Larsen.

– Det er ikkje berre kaien som er ny, det er opna for spaserturar frå stranda til den vesle båthamna, i strålande solskinsdagar som vi har no, og i dagar der vêret tar litt tak i deg. Nokre av gjestane vil truleg setja like stor pris på det siste, litt vind og sjøsprøyt. Den eine benken vi har fått laga heiter nettopp Nordavindbenken.

Med Svein frå spa til sjø

Når Børrea skal visa oss den nye kaien startar turen med ein runde gjennom spa-avdelinga. Designen på spa-avdelinga, frå golv til glas, er langt frå tilfeldig, og dei same linjene går igjen ved den nye kaien.

– Du er på veg inn for å bli knadd. Sjå golvet, ser du mønsteret? Og glasa, kvar dør er ulik, ser du korleis mønsteret illustrerer vatn som renn?

Spa-avdelinga er designa av kunstnar Svein Rønning.

– «Her har vi former som kunne ha passa for Solstrand» tenkte eg då eg såg kva han hadde gjort utanfor Fløybanen.

Hotelleigaren brydde seg lite om etikette då ho tok kontakt med kunstnaren.

– Ingen inviterer seg sjølv inn i atelieret til ein kunstnar, seier Rønning.

Han ler og ristar på hovudet mens han løftar på steinar i det blå vasspeglet mellom spa-avdelinga og alleen ned til sjøen, der han sjølv held på med ommøblering og vedlikehald då Børrea no vil ha stein frå kai-arbeidet inn i den blå bekken ved bassenga.

– Børrea er krevjande og kreativ. Andre har jury og komité, der vi kunstnarar blir sitjande og venta på om vi får tommelen opp eller ned. Her er det berre meg og Børrea, som når ho har bestemt seg ofte vil ha rask levering. Men det er like greit å få press på seg, du blir sjeldan så kreativ av å vera i komfortsona.

– Vi har ein god tillitsrelasjon og det har vore ei utruleg spennande reise, seier Rønning om tida på det som frå år til år blir kåra til det beste, eller av og til det nest beste, hotellet i Noreg.

På stål, treverk og slipt stein

Arbeidet med riving og bygging av ny kai starta på denne tida i fjor

– Under krigen bygde tyskarane ein liten molo der det i dag er ei lun, lita småbåthamn. Steinen hogg dei i fjellet rett ved og det såg ikkje så fint ut. Men no har dette skjæret blitt del av den eine traseen til og frå kaien.

– Målet var ikkje berre det praktiske med å ha ein god nok kai, men at den skal vera lite synleg frå sjøen og at den skal vera bygd av dyktige, i størst mogleg grad lokale fagfolk.

Den nye kaien er 40 meter lang. Plant med treverket på brygga er fjellet i bakkant slipt flatt heilt inn til svaberget så sjølve kaiplata samla sett er romsleg og god.

Svaberget er urørt, men vaska fritt for ugras og mose så berget kjem godt fram. Rustfargen i fjellet går igjen i enkelte element, den boga brua avstål og dei nøye tilpassa trappetrinna i same type metall.

– Eg synest det røffe passar ved sjøen, dette solide, rustfarga skal minna gjestane om kvar dei er.

Lokale ekspertar

Frå enden ved stranda kan du køyra på slipt fjell med lastebil fram til kaien, frå enden nedanfor spa-avdelinga snirklar det seg ein sti av skråstilte trebord i ein smal gang ut mot kaiplata. Langs begge entreane og ved kaien er det benkar, også dei teikna av Rønning og sydd etter fjellet. Rekkverk i rustfritt stål høyrer med, på dei brattaste stykka har kunstnaren fått leika seg med med å forma eit gjerde under rekkverket.

Osingen Gunnar Takle Pedersen frå Norconsult har hatt ansvar for prosjektering og konstruksjonsteknikk, mens det er Skanska som har bygd kaien. Stålbrua og trappene er levert av Os-firmaet Johs Sælen & Sønn, benkane av Bjørn Aasen ved Interiør-Snekkeriet i Bergen og rekkverket av Størksen Rustfri Industri. Bordplatene på kaien er frå Jondal, bordbeina frå Røros.

– Det har vore ein fryd å jobba med desse gode handverkarane, saman med Padøy Transport og Bjørn Halhjem Kranservice, som har løyst dei krevjande løfta på ein fantastisk måte. Dei har fått litt å bryna seg på alle saman, men det har sett ut som om dei har likt utfordringa, seier Børrea mens ho går frå Nordavindbenken til Klinebenken.

«Jeg har vært her i 92 år»

Då Midtsiden fekk omvising onsdag var det rigga opp med grilling og servering mellom stranda og kaien.

– Det er ei forening som har møtet sitt her, for 41. år på rad. Det er ein fryd med alle som held fram med å koma tilbake, seier Børrea, etter nokre travle veker med streik, der ho sjølv måtte i sving med å reia opp fleire dusin senger per dag.

– Skal 120 år feirast?

– Det er ikkje så mange firma som opplever det å bli 120 år, men eg ser ikkje for meg at vi kjem til å gjera så mykje ut av det. Dei lange tradisjonane våre blir vi stadig minna på i små augeblink der gjestar fortel om sine og eldre slektningar sine opplevingar ved hotellet.

«Det er noko kjent med deg», sa ein gjest til hovmeisteren for ikkje så lenge sidan.

«Eg har vore her i sju år no» svarte han.

«Ja, vel. Jeg har vært her i 92 år» svarte gjesten.

– Liknande fine historiar har vi fleire av. Du forstår at du har noko å jobba for når du ser kva Solstrand betyr, og har betydd, for mange av dei som har besøkt oss.

Statsraaden kjem i juni

Eit av dei fine besøka som er venta i sommar er av Statsraad Lehmkuhl, som endeleg slepp å bruka lettbåtar for å få passasjerane i land.

Statsraaden er oppkalla etter Kristofer Lehmkuhl (1855-1949), som tok initiativ til å få båten kjøpt til Noreg i 1923.

Kristofer var svogeren til Christian Michelsen (1857-1925), som bygde hotellet Solstrand i 1896.

Fleire saker