Kultur | 01. juli 2009

Rocka festivalvert

Olav Valle opnar garden sin for rockefestival, mot at han sjølv får koma med eit lite innslag frå scenen. − I tillegg må ungdomen betala for spilt mjølk, kyrne blir litt i ubalanse desse dagane, spøkar den spreke bonden.

Rocka festivalvert
Kjetil Vasby Bruarøy
Kjetil Vasby Bruarøyonsdag 01. juli 2009 09:40

Bildeserie:

1 av 3

Det nærmar seg neste festival i Os denne sommaren, 17. og 18. juli blir festivalen «Søfteland Rock 'n' LOL» arrangert for tredje år på rad. Frå 200 på festival i foreldra sin hage i 2007 auka publikumstalet til 600 på garden til Olav Valle i 2008.

No opnar Valle garden sin igjen, kanskje til eit publikum på over 1000 i år.

− Eg fekk scenetid i fjor og har bestilt meir scenetid i år, seier Olav.

Han stiller med artistnamnet: Olav and his K-1 Chickendales - memory of Monterey 67 - Woodstock 69!

− Det blir eit musikalsk standup som tar deg med på ei psykedelisk ferd gjennom starten på heavy og psykedelia, og gjer deg eit innblikk i the California Sound. Høg Flower-Power faktor, lovar Valle!

Ideell partyplass
Inn ved skulen, ned til Eikhaugvegen og over brua finn du garden til Olav Valle. Ideell til å arrangera rockefestival, meiner Andreas Lindborg og kameratane.

− Berre det å gå over brua er litt symbolsk. Garden ligg for seg sjølv, og har ei fin strandlinje i Gåssandvatnet. Her er det camp og bading – det er til og med gjestar som kjem «sjøvegen», fortel Andreas.

Han reknar med at endå fleire kjem for å overnatta ved vatnet i år. Mellom «drus camp» og sceneområdet står eit lite hus som elles ikkje er i bruk. Dette fungerer som backstage under festivalen.

Ku(l) samtalepartnar
Heldigvis er ein av kameratane son til bonden. Det å få bruka garden til festivalområde er ikkje noko problem.

− Når du kjem i ein slik alder som meg så må du ta imot det som kjem. Litt førebuingar må til. Kyrne held graset lågt, men blir flytta ti dagar før festivalstart, så ikkje det heng så mykje lukt igjen til ungdomen. Og så må kyrne venna seg til å bli mjølka til andre tider, under festvalen slepp dei å gå i fjøset, då held dei seg bak i skogen, fortel Olav Valle.

Han fortel også at kyrne får nye funksjonar under festivalen.

− Eg har sett nokre av dei mest marinerte festivaldeltakarane ta seg ein prat med ei ku. Eg trur dei forsto kvarandre godt, ler bonden.

Auka budsjett – utvida program
Festivalarrangørane har fått ei pengegåve på 15.000 kroner av Visjon Vest.

− Vi har fått mykje merksemd, mange fine tilbakemeldingar og fleire band som tar kontakt og seier dei vil spela hos oss, seier Andreas Lindborg.
Mange av artistane som sto på scenen på Søfteland i fjor har utmerka seg positivt etter festivalen. Nokre kjem tilbake for å spela i år, andre er nye.

− Etter vår meining har vi per dags dato, dei heitaste artistane i Bergen og omegn, seier Andreas.

Desse artistane er blant dei som er aktuelle for Rock 'n' LOL 2009:
• Karin Park
• John Olav Nilsen & Gjengen
• Ungdomskulen
• Kvelertak
• Djuret (frå Sverige)
• Blood Command
• Riff Raff

I tillegg lovar Lindborg fleire lokale rockarar på festivalen. Midtsiden.no kjem tilbake med meir.

Spennande? Vil du ha ukas høgdepunkt i innboksen?

Tilbod: 1 månad for 1 kr

No kan du lesa Midtsiden.no i 1 månad for kun 1 kr.

  • Tilgang til alt innhald
  • Utan bindingstid
  • Frå 145 kr/md.
Les meir og bestill

Abonnementet blir fornya kvar månad. Du kan seia opp kor tid du vil, og blir då ikkje belasta for neste periode.