Rocka rundreise

Tokyo, Sidney, Austin og Lima: Andreas Lindborg og to kameratar tar ei solid rundreise for å henta inspirasjon til årets Rock 'n' LoL-festival.

Kjetil Vasby Bruarøymandag 11. jan. 2010 08:36

Sundag kveld starta turen til Andreas Lindborg og Niklas Linde. Halvvegs i den fire månadar lange rundreisa heng også Erik Aasen seg på.

- Vi har nyleg vore i militæret alle saman, og sidan festivalen stikk av med mesteparten av sommarferien min, blir dette for min del både ferie og samling av inspirasjon til årets Rock 'n' LoL, seier Andreas.

Førebels er ingen band booka til festivalen, men Andreas og broren William har fleire i kikkerten.

Festival i Australia
Andreas Lindborg er general på Søfteland Rock 'n' LoL og skal saman med kameratane på rockefestival i Australia og til Austin i Texas for å høyra mykje LIVE-musikk.

- Festivalen i Australia blir bra, med konsertar i fleire ulike byar, blant anna Sidney. Faith no More og Anthrax er blant banda vi skal ha med oss, fortel han.

- Austin skal vera ein fantastisk by for musikkinteresserte, så eg gler meg veldig til å slå ihjel ei god veke der. I Mexico trur eg berre vi kjøper oss kvar sin kassagitar og slår oss ned på eit fortau.

Snakkes!
Sundag kveld starta reisa, i dag går turen vidare frå Oslo via London til Tokyo. Men før gutane pakka tannkosten hadde dei fest, ikkje avskjedsfest, men "snakkes"-fest, på Bar2Be fredag.

- Det var sinnsjukt gøy, tok heilt av. Og i dag hadde Niklas ei fin overrasking til meg, ein pizza frå Memos som vi åt i bilen på veg til Flesland. Det var eit fint "snakkes" til Søfteland før avreise!

Avsluttar i Rio
Frå Tokyo, Hong Kong, Hanoi og Sidney går turen vidare til Los Angeles, der dei møter Erik Aasen, og Las Vegas. Etter Austin reiser dei tre til New York og Mexico, og seinare vidare til Lima.

- Vi skal også gå inkavegen og sjå Machu Picchu, før vi avsluttar i Sao Paulo og Rio de Janerio. Der skal vi berre slappe av og lade batteria til hardkjøret som ventar, med førebuing til festival. Vi er heime igjen 2. mai, fortel Andreas Lindborg.

Dei tre kameratane skal skriva blogg frå reisa på softelandrock.no. Årets festival går av stabelen 16. og 17. juli.