Magne Lunde får kongens fortjenestemedalje

Rocketrommisen slo til

VIDEO: Magne Johan Lunde viste kvifor han er høgt verdsett då han slo til med ein forrykande trommesolo då han fekk kongens fortenstmedalje laurdag.

Av: Andris Hamre

Geir Keys tok initiativet til å nominera Magne Lunde til Kongens fortenestemedalje i sølv. Laurdag blei medaljen overrekt Lunde under ein musikalsk og hardslåande sermoni i Oseana.

- Kommunen stilte seg bak nominasjonen frå Keys. Innstillinga, saman med uttale frå mange av Magne sine kontaktar opp gjennom åra, sendte vi til kongehuset med tilråing om at Magne fekk fortenestemedalja i sølv, fortalte ordførar Terje Søviknes til Midtsiden etter tildelinga.

Kongen var einig med Keys og Os kommune og tildelte Magne Lunde kongen sitt sølv for lang og tru teneste som musikar og trommelærar.

- Takk for at du tek turen

Under tildelinga laurdag stilte rektorane ved Os, Vaksdal og Radøy opp med gåve til den kjære og kjente trommelæraren.

- Takk for at du orkar å ta turen til Radøy og Manger for å læra unge trommeslagarar kunsten, sa rektor Jarnfrid Gunnarson ved Radøy Musikk- og kulturskule, kor Magne har vore lærar i halvanna år.

Frå dei tre musikkskulene fekk trommisen ein trommebarkrakk og koppar han kan nyta den vesle fritida han har på.

Eige trommerom på Luranetunet?

Under tildelinga av medaljen uttrykte ordførar Terje Søviknes ei bekymring for kommunen.

- Du er som ein god årgansvin. Du blir betre år for år. Det har gjort at vi har byrja å tenka på kva vi skal gjera om du treng koma på Luranetunet med tida. Truleg må vi innreia eit eige trommerom i kjellaren slik at du ikkje går rundt og slår på rullatorar, bekken og anna du kjem over, smilte Søviknes til latter frå Magne og salen.

"Diare i nevane"

Om lag 150 vener, fans og familie hadde tatt turen for å heidra Magne laurdag. Ein av dei var Magne sin gamle trommelærar Paul Hægland.

- Paul er ein kar eg har, og alltid har hatt, stor respekt for. Han har betydd mykje for meg, fortalde Magne før tildelinga.

- Eg hadde Magne som elev frå han var cirka 10 år og mange år framover.

- Han hadde det som bergenserane kallar "diare i nevane" og var allereie den gongen klar på at når han blei stor så skulle det bli musikk og trommer, fortel den gamle trommelæraren, som sjølv var slagverkar i Bergen Filharmoniske orkester.

- Eg har følgt Magne opp gjennom åra og synes han har vore flink til å fornya seg. Trommesetta har forandra seg heile vegen, men Magne har følgt utviklinga, skryt Hægland som trekk fram at Magne er ein dyktig musikar og ein fin ambassadør for rockemusikantar langt utanfor landets grenser.

- Eg synes det er veldig kjekt at han får dette heidersteiknet og vil berre gratulera han med dagen, avsluttar Paul Hægland.

Sjå korleis Magne Lunde blei heidra i videoen nedanfor (9.29 min). Skriv di helsing til Magne i kommentarfeltet nedanfor.

Magne Lunde er den fjerde kulturpersonen i Os som har mottatt Kongen si fortenestemedalje dei seinaste åra. Tidlegare har Jimmy Øvredal og ekteparet Kåre og Olaug Herdlevær fått medaljen for deira mangeårige innsats for kulturlivet.

Neste gong du kan oppleve Magne Lunde på scenen i Os er under Osøren Blues og Jazzfestival i juli, der han speler saman med Mike Gallaker og Yngve Moe i MMY på utescenen framfor Peppes.

Fleire saker