Romjulsprat med Tore Kleppe

Vi har hatt ein prat med eit knippe kjente ansikt i Os, basert på formatet på «Fredagsportrettet», som var fast spalte på Midtsiden for 15 år sidan. Gjennom romjula byr vi på nye intervjuobjekt kvar dag. Heiasjef - malar - og nesten Noregs hyggelegaste handverkar, Tore Kleppe er dagens gjest.

Om Midtsiden spanderte reisa, kor ville du tatt turen (ein stad du ikkje har vore før)?

– Det hadde vore greitt med ein USA-tur. Eg har høyrt at det skal vera bra. Dei eldste gutane mine har vore der, og dei tykte det var eit godt reisemål.

Gi 100.000 kroner til veldedig formål. Kven får pengane?

– Eg er jo lokalpatriot på min hals, så der er svaret enkelt; Frivilligsentralen i Os.

Du skal vera éin månad åleine på ei aude øy. Det kjem forsyningar med mat og vatn, kva tre ting tar du med?

– Ein må halda motet oppe i ein slik situasjon, så ein spegel må eg ha med.

– Og så hadde eg teke med ein gitar - ikkje fordi eg kan spela gitar, men for å nytta tida til å læra meg å spela gitar. Til sist hadde eg teke med ei øks som naudredskap.

Kva er det finaste bygget i Os?

– Oi, her er det mykje å velja i, men eg vel å landa på Solstrand Hotell & Bad.

Kva veg skal dorullen henga, med papiret ut frå veggen eller nærmast veggen?

– Den må utover. Det er det ikkje tvil om.

Inviter tre kjendisar til middag. Kven får koma?

– Ole Gunnar Solskjær skulle fått lov til å koma i dag. Og så ville eg hadde godeste Leif Bjarne Bøyum til bords. For å toppa det heile hadde Nelson Mandela vore middagsgjest hos meg.

Kven ser du opp til?

– Eg likar folk som inspirerer meg. Igjen er eg lokalpatriot, og vel å trekkja fram ordførar Terje Søviknes og leiar for frivilligsentralen, Tove Hille.

– Desse to er på 24-7, og det likar vi.

Kor tid blei du sist sint, og kvifor?

– Det skjer ikkje så ofte, men køyr ein kombo med lågt blodsukker og at eg stongar hovudet oppi noko på jobb, ja då kjem det lett nokre glosar. Eg er ikkje ein sint mann av natur, men dette skjer av og til, og eg veit at det kjem til å skje att. Ferdig diskutert!

Kor tid var du fysisk mest utmatta?

Kleppe svarar først at det må ha vore på ein HV-øvelse nokre år tilbake, då Bjarte Wallevik som leia utmarsjen, sitat: «ville jo aldri slutta å gå».

Nokre timar etter intervjuet tok Kleppe kontakt med eit nytt svar;

– Kom brått på at eg gjekk Dronningstien i juni. Då var eg rimeleg røken i beina.

Om du skulle hatt eit anna yrke, kva skulle det vore?

– Eg kunne godt tenkt meg å vera lærar. Det å kunne vera saman med folk, og samstundes få læra dei noko, den tanken likar eg. Eg har faktisk søkt på ein lærarjobb i si tid, legg Kleppe til.

Kva musikar eller band ville du helst gått på konsert med?

– Eg toler ein konsert til med Bruce Springsteen eller AC/DC om moglegheita opnar seg.

Kva bok las du sist?

«Jeg er fotball» av Zlatan Ibrahimović, kjem det krystallklart frå Kleppe. Den las eg på ferie i syden tidlegare i år.

– No skal det seiast at det var den første boka eg har lese dei siste 15 åra, og truleg den siste på dei neste 15.

Anbefal ein god film eller serie

– Die Hard-fimane med Bruce Willis. Då vert eg underhaldt. Du veit Yippee Ki Yay...osb!