Kai, Marianne og Jan-Erik i siste innspurt før opning torsdag. (Foto: Kjetil Vasby Bruarøy)
Kai, Marianne og Jan-Erik i siste innspurt før opning torsdag. (Foto: Kjetil Vasby Bruarøy)

Rørleggeriet tredoblar i Os Næringspark

Bildeserie: Etter 20 år i Landboden opnar rørleggarmeisterane ny butikk i Holtbrekka.

Kjetil Vasby Bruarøy
27. september 2017 - 21:04

I mai fortalde Rørleggeriet Os AS om planlagt flytting frå Landboden til Os Næringspark. Forandringa blir stor for både tilsette og kundar når rørleggarmeisteren med butikk flyttar frå butikk og lager i to nabolokale til alt på eitt plan i 600 kvadratmeter mellom biblioteket og 2Villa.

– Den førre butikken var på 120 kvadratmeter, inkludert ein del hyller med delar i butikken. Den nye har salsflate på 270 kvadratmeter, i praksis nesten tre gongar så stor som den førre, fortel eigarane, Kai Paulsberg og Jan-Erik Særvold.

– Vi fekk selt heile utstillinga i den gamle butikken, med unntak av eit par spegl. Alt i den nye butikken er heilt nye utstillingar, supplerer damene i butikken, Marianne Rikstad og Irene Særvold Halvorsen.

Stor utstilling og eige designstudio

Med utsikt over Bjørnafjorden kan dei tilsette i butikken no stå midt i lokalet og ta imot kundane. I butikken er det blitt plass til å stilla ut både tekniske løysingar, vaskerom og ei rekkje komplette baderomsmiljø.

– Det var godt å få visa så mange komplette miljø, frå det enkle og reine til noko sprekt og nytt. Dei i litt høgare prisklasse har fått ekstra plass, fortel Marianne, og viser dusjrom med plass til to og handkledestativ med varme og LED-lys.

Fliseprøvar og ei rekkje typar treverk og fargar til skapdører er ramsa opp i ein eigen, stor bås midt i butikken. Der det òg er ein flatskjerm.

– Her kan vi designa badet i eit eige illustrasjonsprogram og enkelte sitja med kundane og flytta dusj, vask og badekar rundt i rommet, for at dei enkelt kan bestemma seg for kva innreiing og plassering dei liker best.

I bakkant er òg to kontor. Mellom butikken og porten til lageret er eit stort pauserom.

Tørrskodd frå lager og ut i felten

Seks av dei ni tilsette er fast ute i felten. Også desse får langt betre fasilitetar.

– Dette er natt og dag! Her kan vi rygga inn på lageret med både bil og hengar. Det er lyst og fint, i tillegg har vi garderobe og to kontor også her ute, seier Thomas.

Rørleggeriet fekk i sommar kontrakt med Veidekke på legging av vatn og avlaup i begge tunelløp i begge tunellane mellom Svegatjørn og Rådal på ny E39.

– Her har vi oppdrag til 1-2 mann fram til 2019. Men det er rehabilitering av bad, og bygging av nye bad, vi bruker mest tid på.

Fest før dugnad

Då Midtsiden var innom midt på dagen onsdag, eit døgn før opning, var det naturlegvis høg aktivitet i lokalet.

– Vi har leverandørar på plass som monterer sitt utstyr, og no i innspurten har vi hatt god hjelp på ettermiddag og kveld av våre eigne tilsette, seier Kai.

Stå på-vilja skal vera ekstra stor etter ei firmareise dei hadde i sommar. Då var alle tilsette, med følgje, til Nice og Monaco på ei opplevelsesrik langhelg for å feira firmaet sin 20-årsdag.

– Det låg vel i korta at vi ville be om litt ekstra innsats desse dagane her, og det ser alle ut til å vera innstilte på.

Les meir om

Næringsliv Handel