Liten brann fylte ungdomsskule med røyk

Klokka 17.55 blei brannalarmen ved Os ungdomsskule løyst ut, med direktemelding til brannvesenet.

Det kom òg melding om røykutvikling.

– Vi trudde først det var døralarmen, og merkte ikkje noko til røyken, seier to tilsette som var ute av bygget på kort tid.

Mykje røyk i første etasje

Politiet var først på staden, brannvesenet kom rett bak med mannskapsbil, tankbil og lift. Røykdykkarar var raskt inne i bygget.

Så byrja det å koma ein del røyk ut av inngangsdøra i sør, nærmast grusbanen.

– Vi veit ikkje om det er fleire i bygget, men brannvesenet søker no gjennom skulen, seier innsasleiar, politioverbetjent Christine Grindstein.

Kom frå bosspann

Klokka 18.20 kom det òg ein ambulanse til staden. Då var brannen lokalisert og sløkt.

– Vi fekk raskt lokalisert kvar røyk-kjelda var, då tavla viser kva detektor som først blei løyst ut, seier varabrannsjef Erik Walden.

Røyken kom frå brann i eit bosspann. Bosspannet sto i første etasje i søndre fløy, ikkje langt frå kantina.

– Det er ein del vatn i etasjen, som vi no tørkar ut, seier Walden.

Politiet kan foreløpig ikkje seia meir om årsaka til brannen, men bosspannet er tatt ut av bygget og blir undersøkt.

Ungdomsskulane i Bjørnafjorden kommune er i raudt smittevern-nivå, noko som betyr at elevane vekslar på å vera på skulen og ha heimeskule.

Det er foreløpig uvisst om røyk og vatn bli rydda nok til at kapasiteten ikkje blir redusert, at endå fleire må ha heimeskule. Foreldre og elevar bør med andre ord følgja med på om det kjem meldingar frå skulen i kveld.

– Det er ein del sot og vatn på staden, om denne fløyen kan brukast i morgon er foreløpig uvisst. Rektor er på plass, og det blir tatt vurdering på dette i løpet av kvelden, seier varabrannsjefen.

OPPDATERT: Os ungdomsskule melder, trass at berre éin av tre klasseromsfløyar er råka, blir heile skulen stengt i morgon, torsdag. Vi får opplyst at årsaka er at sotpartiklar har spreidd seg til andre delar av bygget. Os Aktiv, med to klasserom, er naturlegvis ikkje ramma, men skulen har ikkje plan om å bruka desse fasilitetane torsdag.