Rusa mann gjekk midt i vegen og slo etter bilar

Politiet rykte ut til Mobergsbakken klokka 23.13 fredag kveld etter melding om full mann som gjekk midt i vegen og slo etter bilar.

Mannen blei køyrd til arresten i Bergen, opplyser politiet via Twitter.

Ifølgje eit vitne, som var nær på å køyra mannen ned, skal han først ha lagt i vegen nær Os brannstasjon.

– Han låg i vegen, inntil refuga i rundkøyringa, og det var så vidt eg såg han, fortel kvinna.

Til fare for seg sjølv

Ho stoppa, men hadde problem med å få kontakt med vedkomande.

– Han reiste seg opp, mumla noko på norsk og eit anna språk, så sprang han bort og slengte seg på bilen min. Den sto parkert i busslomma. Han sprang vidare til parkeringsplassen til Kiwi og urinerte oppetter ein bil før politiet kom. Eg var redd for at han skulle springa ut i vegen og bli påkøyrd, og det kom fire gutar i ein annan bil som hjelpte meg i forsøk på å roa han ned.

Politiet skal òg ha hatt ein kamp med å få kontroll på han. Dei skal ha møtt han i Byvegen i 21-tida, og køyrd han til legevakt for sjekk.

Slåstkamp etter stengetid

Klokka 03.33 natt til laurdag var det ein slåstkamp utanfor Catten Nightclub.

Politiet tok kontroll på to menn, ingen av dei var skadd etter tumultane.