Rydda 36.000 kvadratmeter for snø

Lageret i Ådnadalen, det største taket i Os, har hatt trøbbel før. I mars 2010 gav rundt 250 av over 36.000 kvadratmeter etter, og raste saman.

Den gong var det ikkje aktivitet i bygget, og større snømengder enn i dag.

– Likevel var det prioritert å rydda taket for snø før vêromslaget, seier Tore André Sagstad i 7 Fjell Eiendomsservice, som leverer vedlikehald og vaktmeistertenester på det store bygget.

Sjølv om det ikkje var særleg meir enn desse 30 centimeterane som kom søndag 31. januar, blei det ein stor jobb.

Brukte ti dagar

– Vi fann ein metode med moking ut til sidene, der vi sto med snøfresarar og kasta snøen utfor taket. Det fungerte, men tok tid.

– På det meste var vi 12-13 mann i sving, og det å rydda taket, og seinare få snøen vekk frå veggane, tok ti dagar.

7 Fjell stilte med eige mannskap saman med Fløysand Tak, som hadde ein tekkejobb på taket, og har to snøfresarar i ledig utstyrspark.

Ikkje som i 2010 - foreløpig

I 2010 blei det ny snørekord med 63 dagar med kvite bakkar frå 19. desember til 19. februar. Snødjupna på målestasjonen på Florida var 19. februar 26 centimeter.

Men det kom fleire lass med snø den vinteren, og veka etter var det fleire som fekk problem i Os.

24. februar gjekk kommunen ut og oppmoda folk å moka taka sine.

Same dag fekk svalgangen på Kuventræ barneskule seg ein knekk, og på Bohus høyrde dei eit brak og stengte butikken fram til neste dag for å rydda snø og reparera skiljeveggar i butikken som hadde blitt skadde.

Dagen etter blei Oshallen og Nore Neset Aktivitetshus stengt, men med stor dugnadsvilje kunne også dei opna igjen etter ein dag med moking.

To veker seinare var det kollaps i Ådnadalen og veka etter ramla ein gamal låve i Lønningdal i bakken.

No skal snøen regna vekk

Til no ser det ut som om vi, med unntak av frosne rør hos privatpersonar og på tre barneskular, har ridd av vinteren for denne gong.

Det er meldt mildvêr så langt meldingane rekk, med regnbyger frå torsdag kveld, gjennom helga og utover i neste veke. Temperaturen skal halda seg på 6-7 plussgradar på dagtid.

• Sjå vêrvarsel for Osøyro på VG Pent