Rykte ut til drukningsulykke i Korsfjorden

I 15.20-tida fredag blei det meldt frå 110-sentralen at ein mann var observert flytande i sjøen.

– Vi fekk først melding om at dette var utanfor Halhjem, fortel brannsjef i Os, Stein Gjøsund.

Då dei var på veg ut frå stasjonen kom det ny melding. Ulykka var ved Rishavnholmen nær Krokeide. Personen var observert av mannskap om bord i ferja mellom Krokeide og Austevoll.

– Vi sendte to mann med Unik-båten frå Halhjem og sendte dykkarane med bil til Krokeide.

Omkom i ulykka

Personen i vatnet blei henta opp av redningsmann frå luftambulanse. Dykkarane frå Os blei frakta ut med ambulansebåt og starta søk. Det var i starten uvisst om det var fleire personar i båten.

– Den 43 år gamle mannen er død. Pårørande er varsla, opplyste Helse Bergen klokka 20.45 fredag kveld.

Mannen var på tur åleine i ein sjark på 19 fot då ulykka skjedde. Sjarken har grunnstøtt, men ifølgje BT.no er det førebels uklart kva som har skjedd eller om mannen ramla i sjøen før eller etter at sjarken grunnstøtte.