Rykte ut til ungdomsfest i Ervikane

Torsdag kveld i 21.15-tida rykte legevakt og politi ut til friluftsområdet Ervikane.

– Vi fekk melding om ein del mindreårige som drakk alkohol, og at ei ung jente var dårleg, fortel politioverbetjent Anne Lyssand.

Jenta blei sjekka av lege og henta av foreldre.

Politiet har inntrykk av at resten av kvelden gjekk fint for seg, og fann ikkje noko anna å reagera på.

– Det skal ha vore tiandeklassingar som tok seg ei uoffisiell avslutting på grunnskulen, slik dei har gjort dei siste åra.

– Det var ikkje russ eller annan ungdom på staden, og patruljen har inntrykk av at ungdomen hadde det fint.