Perlemorsky sett frå Lekvenmarka retning sørvest. (Lesarbilde/tips@midtsiden.no: Johanne Dale)
Perlemorsky sett frå Lekvenmarka retning sørvest. (Lesarbilde/tips@midtsiden.no: Johanne Dale)

Såg du dette lyset på himmelen i dag?

– Det er fleire som har ringt oss, seier meteorolog Hallvard Larsen.

Kjetil Vasby Bruarøy
04. januar 2020 - 10:50

Laurdag morgon fekk vi tilsendt bilde av eit fargerikt «belte» sett frå Lekvenmarka, og tilsvarande fargerike felt på himmelen sett frå Øyane.

– Vi har fått fleire telefonar i dag, det har vore synleg frå både Bergen og Lindås, fortel Hallvard Larsen frå Meteorologisk institutt.

Han trengte ikkje å få bilde tilsendt for å svara på kva dette er.

– Det blir kalla perlemorskyer. Det er ein god artikkel på Store norske leksikon (snl.no) som fortel meir om fenomenet.

Iskrystallar i stratosfæren

Perlemorskyer, eller polarstratosfæriske skyer, er lysande, ofte linseforma skyer som opptrer i stratosfæren. Skyene blir danna i ei høgde på 20-30 km over Jorda, og ligg dermed meir enn dobbelt så høgt som vanlege slørskyer (cirrus).

Perlemorskyene består av iskrystallar. Solstrålene blir brotne i iskrystallane, akkurat som når lyset går gjennom eit prisme, og det flotte fargespekteret kjem fram.

Det er best å sjå perlemorskyene når sola står rett under horisonten. Skyene kan ligga der heile dagen, men ser ofte berre ut som eit lett slør.

Ifølgje artikkelen på snl.no er det berre lysande nattskyer som har meir spektakulære fargar enn perlemorskyer.

– Once in a liftetime

Spaceweatherarchive.com fortel i ein artikkel måndag 30. desember at det i desse dagar er «spectacular outbreak of polar stratospheric clouds (PSCs) is underway around the Arctic Circle».

– Dette er eit «Once in a Lifetime»-fenomen! seier Chad Blakley, som driv Lights over Lapland-turservice for folk som vil sjå nordlys over Sverige.

Perlemorskyer i seg sjølv er spennande, fordi stratosfæren normalt ikkje har skyer. No er det eit stort utbrot av dei.

Les meir om

Lokal