SakkoSekkStudio: Kongshaug Musikkgymnas - Til Deg!
SakkoSekkStudio er Midtsiden sin nye videopodkast. Med mobilt studio møter vi intervjuobjekta der dei er.
Sesong 1, episode 1: Oddvar Rotvik, rektor ved 20 år gamle Kongshaug Musikkgymnas.
Laurdag har 120 elevar to konsertar i Oseana. I dag var det framsyning for elevar frå andre skular.
Korleis har gymnaset endra seg desse 20 åra? Kva synest rektor om kallenamnet «talentfabrikk»? Kor sterkt står kristendomen på den kristne skulen, og korleis halda orden på alle elevane som bur på internat?
Etterlengta studiosatsing
Midtsiden har drive med video i nesten ti år, med ei opptrapping då Ørjan Håland blei tilsett i 2015.
– Vi har hatt samarbeid med Varde i over ti år, blant anna innan video, frå utstyr til bemanning. Både Varde og Håland sjølv har med ujamn frekvens vist stort engasjement for å starta TV-studio, men eg har hengt i bremsen, fortel Midtsiden-redaktør Kjetil Vasby Bruarøy.
Redaktøren var redd for at det ville kosta meir enn det smakte.
– Men så snubla eg over nokre sakkosekkar i Midtsiden-farge og, glad som eg er i bokstavrim, tenkte at dette kunne danna ei fin, uformell ramme på eit mobilt, effektiv studio.
Gode samtalar om varierte tema
Håland fekk med seg kollega og TV-debutant Kjetil Osablod Grønvigh. Med fritt spelerom og sans for gode samtalar har dei forma eit nytt, lokalt studio.
SakkoSekkStudio sine sendingar kjem til å variera i frekvens og lengde, i tid og stad, og i gjestar og tema, frå kultur og politikk til næringsliv og sport.
Sekkane landa for ei veke sidan - vi har hatt fleire opptak - i dag er det lansering!