Samla inn 65.917 kroner til CARF
Bildeserie: Tradisjonen er snart 30 år - for Os barneskule er dette ei like stor happening kvar gong.
Då Gregory Smith i 1992 selde alt han hadde i Noreg og på Os for å flytte til Brasil for å hjelpe gatebarna i São Paulo starta samstundes det som har blitt ein årelang tradisjon på Os barneskule, nemleg å arrangera Gregory Smith-kveld til inntekt for prosjektet i Brasil.
Gregory Smith er sjølv blitt pensjonist, og arrangementet heiter no CARF-kveld.
På tysdag var det på ny tid for vårens vakraste eventyr på Os barneskule.
Det vart ein kveld med rævaknus, våte svampar, kortreist kunst, langreist kunst, ansiktsmaling - og eit hav av kaker og muffins.
Kulturutveksling
Rektor ved Os barneskule, Laila Aarbakke, fortel at CARF-kvelden engasjerer både ungane og dei tilsette ved skulen;
– Det er eit sikkert vårteikn når SFO tek fram «krokodille-perlene» og perlar krokodille-nøkkelringar. Vi har òg førebudd oss med å sjå film frå CARF sitt arbeid, og vi har snakka mykje om det å gjera noko for andre.
Like før 17. mai fekk skulen besøk av ei kulturgruppe frå Kolibri Brasil.
– Dei gav oss ei vanvittig flott danseframsyning i gymsalen. Ungane her på skulen hadde sjølv førebudd ein song som dei framførte til gjestane, og det var imponerande å sjå og høyra kor mykje stoltheit ungane våre la i den kulturelle gåva til gjestane.
Jamn sum
Aarbakke fortel at innsamla sum til Gregory Smith/ CARF-kveldane har lagt på i overkant av 60.000 kroner kvart år.
– Det er sjølvsagt kjekt om vi set ein ny rekord i kveld, men vi er oppteken av at dette ikkje skal vera ein kveld som «kostar skjorta» for foreldra. Mange har fleire born som går på skulen, og mange er med og jobbar dugnad før- eller under kvelden, så fokus ligg på å skapa ein viktig og minnerik kveld for alle.
Onsdag ettermiddag kunne rektor Aarbakke fortelja at det vart samla inn 65.917 kroner under årets CARF-kveld.
CARF
I 1971 kom den britiske utvekslingsstudenten Gregory John Smith til Noreg. Turen skulle visa seg å bli meir enn ei utveksling for Smith som bestemte seg for å bli. 21 år seinare skulle livet ta ei ny vending.
Smith hadde ein idealistisk draum om å bruka ressursane sine og den store arbeidskapasiteten sin til å hjelpa i ein annan del av verda. I 1992 blei Children At Risk Foundation, CARF, stifta.
Organisasjonen arbeider med førebygging, rehabilitering og ettervern av gatebarn i Sao Paolo