Næringsliv | 02. okt. 2016

Samlar byggebransjen i eige forum

Kva ventar dei av kvarandre, utbyggarane, kommuneadministrasjonen og bankane? Fredag kan folk få klare svar.

Samlar byggebransjen i eige forum
Kommunalsjef Aina Tjosås stiller opp når Arild Vikøyr og Herman Brandt inviterer til seminar om utbygging i Os. (Foto: Kjetil Vasby Bruarøy)
Kjetil Vasby Bruarøy
Kjetil Vasby Bruarøysøndag 02. okt. 2016 19:26

Køen sto ut døra og tilbakemeldingane frå alle partar var overveldande positive etter byggemøtet i Oselvarnaustet i april i fjor. Fredag er det nytt seminar med same aktørar på gjestelista.

– Vi hadde eit ønskje om å laga eit forum med konkret, lokalt fagleg innhald. Kva ventar byggebransjen av kommunen og kva ser kommunen at utbyggarane kan bli betre på? I tillegg har vi med oss både næringsrådgjevar i bank og tidlegare fagsjef hos Norges Eiendomsmeglerforbund.

– Her er det høgt under taket og lagt til rette for tovegskommunikasjon, sånn at alle kan læra av alle, seier Arild Vikøyr, dagleg leiar hos Vikøyr & Brandt.

– Årsaka til at vi som eigedomsmeklarar tar tak i dette er at vi har mykje med både små og store utbyggarar å gjera, frå ein tomannsbustad til felt på 50-60 hus eller meir. Rundt ein tredel av dei nesten 200 einingane vi sel i året er prosjekt, her har vi alt frå tømrarar som er nye innan eigedom til store aktørar som sikkert har nokre tips å koma til både bank og kommune med.

– Jobbar mot same mål

Kommunalsjef Aina Tjosås seier Os kommune er glad for både initiativet og invitasjonen.

– Når det blir samla fleire frå same bransje på denne måten så stiller vi gjerne opp. Dette er ein svært effektiv måte å nå ut til mange på éin gong.

Det ho synest er blant det viktigaste å få fram er at kommunen og utbyggarane jobbar mot same mål; gode prosjekt som skal sikra livskvalitet for alle, i tråd med «Os inspirerer»-mantraet til kommunen.

– Vi ønskjer å bli sett på meir som ein samarbeidspartnar enn ein kontrollør, derfor er vi på tilbodssida når det kjem til å spreia informasjon. For mindre og nyare utviklarar av eigedom er det ei noko komplisert verd å stiga inn i. Men om dei er nøye med faktorar som plassering på tomt og krav til ferdigattest så sparer dei seg sjølv for både tid og pengar.

– Det er fleire eksempel på det motsette, at utbyggarar har gjort noko i beste meining, men som ikkje er godt nok. Når vi då blir nøydde til å purra kan vi bli oppfatta som masete, og det kan skapa frustrasjon og mindre vellykka prosjekt både i utforming og økonomi.

Ein heil dag på Hauge

Privatmegleren Vikøyr & Brandt har seminaret ope for alle, men det er begrensa med plass.

– Rundt 30 av 50 plassar er booka. Vi held på heile dagen med påfølgande middag og ei sosial stund utover fredag ettermiddag, fortel Brandt.

OPPDATERT: Grunna haustferie er arrangementet utsett. Ny dato er ikkje bestemt, men blir i 2017.

Meklarkontoret tar heile rekninga, både med leige av klubbhuset til Bjørnefjorden Golfklubb og med servering.

– Det var fullsett og folk som sto utanfor døropninga då vi hadde tilsvarande seminar i Oselvanaustet i fjor, no ser vi fram til nye tema og ny erfaringsutveksling i år.

Den største bransjen i Os

Om vi ser på næringsstrukteren i Os er byggrelaterte bransjar blant dei største og viktigaste i kommunen.

Tal som Purehelp har samla viser at minst 5 av dei 11 største bransjane i Os kommune er frå bygg:

1. Oppføring av bygninger 5,335 %
2. Utleie av egen eller leid fast eiendom ellers 4,795 %
3. Aktiviteter i andre interesseorganisasjoner 3,779 %
4. Godstransport på vei 2,509 %
5. Utøvende kunstnere og underholdningsvirksomhet innen musikk 2,223 %
6. Bedriftsrådgivning og annen administrativ rådgivning 2,064 %
7. Annen teknisk konsulentvirksomhet 1,905
8. Grunnarbeid 1,778 %
9. Utvikling og salg av egen fast eiendom 1,715 %
10. Investeringsselskaper 1,651
11. Snekkerarbeid 1,620 %

Spennande? Vil du ha ukas høgdepunkt i innboksen?

Tilbod: 1 månad for 1 kr

No kan du lesa Midtsiden.no i 1 månad for kun 1 kr.

  • Tilgang til alt innhald
  • Utan bindingstid
  • Frå 145 kr/md.
Les meir og bestill

Abonnementet blir fornya kvar månad. Du kan seia opp kor tid du vil, og blir då ikkje belasta for neste periode.