Kultur | 22. juli 2013

– Sånn bør Oseana drivast

Venstre-leiar Trine Skei Grande var fredag i Os for å sjå nærmare på kulturhuset. – Dei raudgrøne kjører for mykje sentralstyring og Søviknes lyttar ikkje godt nok, meiner Glenn Erik Haugland.

Trine Skei Grande lytta til Glenn Erik Haugland, som fortalte om Oseana. (Foto: Kjetil Vasby Bruarøy)
Kjetil Vasby Bruarøy
Kjetil Vasby Bruarøymandag 22. juli 2013 09:23

Komponist og leiar for Os Venstre, Glenn Erik Haugland, har sidan 2007, tidleg i planleggingsfasen av Oseana, vore ein sparringspartnar for Os kommune. Han er no varamedlem i styret i Oseana KF.

Fredag tok Haugland og fleire frå lokalpartiet imot Venstre-leiar Trine Skei Grande for omvising i Oseana og diskusjon om drift av kulturhus.

– Det blir reist mange fine kulturhus i Noreg for tida, men mange av dei slit med det same, å fylla husa med kultur, å by på noko unikt og å få ei god nok drift, seier Haugland.

Samling på terrassen

Trine Skei Grande møtte fredag på Oseana saman med 2. kandidat i Hordaland Venstre, Åsta Aarøen.

– Eg og Trine kjenner kvarandre godt frå før, frå tida då eg var aktiv i Oslo Venstre, seier Haugland om Venstre-leiaren, som har sete på Stortinget dei siste 12 åra, og som blant anna har vore byråd for kultur og utdanning i Oslo kommune.

Dei møttest på terrassen utanfor foajeen før omvising av partikollegaene i Os, Glenn Erik Haugland, Jon Sivert Rykkel og Tommy Espeland.

– Her er Os sin neste ordførar, sa Haugland då han presenterte Grande for unge Rykkel.

– Trongt budsjett og svak drift

Bakgrunnen for besøket er utfordringa fleire nye kulturhus står ovanfor.

– Oseana og andre kulturhus slit med drifta og resultatet blir ofte at dei satsar på det dei ser på som sikre kort, nokre få store namn i året, for å få ei botnlinje som ser bra ut.

– Kulturhusa blir ingen sosial samlingsplass, dei produserer ikkje noko unikt, dei byr ikkje på noko spesielt, men får eit nesten likt program landet over, seier Haugland.

Han viser blant anna til kulturforskar Georg Arnestad ved Høgskulen i Sogn og Fjordane sin kronikk Kulturhusvekst uten kontroll i Aftenposten i november i fjor.

– Vi bør få ein lågare terskel for å arrangera noko i Oseana så tilbodet blir meir variert og kulturhuset meir livleg. Dette har eg sagt sidan start, men det passar tydelegvis ikkje inn i Frp sin kulturpolitikk. Styreleiar Søviknes, som i stor grad styrer Oseana, ser ikkje ut til å villa lytta til dette.

Vil ha mindre sentralisering

Grande, som har vakse opp i ein musikarheim, med ein far som dreiv musikkskule i bustaden sin, er godt kjent med problematikken.

– Dei raudgrøne har praktisert ein veldig konservativ kulturpolitikk der nesten alt av pengar har gått til nokre få etablerte institusjonar og ensemble.

– Venstre vil heller fylla kulturhusa med eit meir variert utval frå landet sine mange dyktige kunstnarar og artistar, vi vil ha eit fokus på innhald og bygga opp regionale kulturfond som gjer det mogleg å satsa på frie produksjonsmiljø og lokale kulturgründarar, seier Trine Skei Grande.

– Eg har vore rundt i Noreg og sett på mange kulturhus, og det er utruleg kor mykje spennande, kor mykje rart, kor mykje kreativt, folk gjer suksess med i dette landet. Det handlar ofte berre om å gje desse entreprenørane ein scene. Og den treng ikkje alltid vera så stor.

Kan få betre lokalt fotfeste

– Oseana er ikkje i nærleiken av å gå rundt. Begge desse åra etter opninga i 2011 har Grieg måtta koma inn og sponsa drifta, fortalte Jon Sivert.

– I tillegg har ikkje kulturhuset lykkast i å bli ein plass for alle. Dei fleste på min alder har aldri vore her, og dei som går på konsertar her marsjerer rett ut dørene etterpå, ned til Peppes for å kosa seg. Dei blir ikkje sitjande her, i foajeen eller i restauranten.

Haugland meiner at lågare terskel, støtte til frie produksjonar og eit kulturhus som fungerer meir som ein samlingsplass også kan bidra til å styrka drifta.

– Det kostar i kroner, arbeidsinnsats og kompetanse, å driva eit kulturhus – men på sikt – om du klarer å gje osingane ei auka eigarkjensle til Oseana, vil det gje huset eit endå betre inntektsgrunnlag.

– Det er ikkje for seint, vi skal greia å gjera noko med det, seier Glenn Erik Haugland.

Grande fortalte om Weidemann

Etter å ha sett foajeen, med skulpturutstillinga, og storsalen, gjekk turen til restauranten og utstillingane i Griegsamlinga og i Hvelvet (Nupen).

Gjesten Trine Skei Grande var imponert og interessert, og kommenterte at denne samlinga måtte vera eit eldorado for ein lærar som underviste i kunst.

– Kulturskulen har dessverre ikkje visuell kunst på programmet, kunne Rykkel skyta inn.

Men Grande heldt fram med å visa si begeistring, og hadde også litt å fortelja om nokre av kunstnarane som er representert i Griegsamlinga.

– Eg hugsar Jacob Weidemann (1923-2001) ringte seint ein laurdagskveld, då Bondevik var statsminister, og insisterte på å få snakka med Kjell Magne.

– Han sat med eit bilde framfor seg som han ville gje til statsministeren, men det var på eitt vilkår; Bondevik måtte lova å ikkje gje det vekk i fylla, lo Grande.

– Bildet blei hengande over trappa ved statsministeren sitt kontor i regjeringskvartalet, men eg trur det blei øydelagt av bombeangrepet 22. juli.

Stolt over sommarsamlinga

Etter omvisinga bar det inn på møterommet Ervikane ved restauranten.

Her kom store delar av resten av lokalpartiet innom før lunsj saman med Grande.

– Det var heilt fantastisk å ha Trine på besøk, både fordi ho er ein gamal ven, og fordi ho er ein fullblods kulturpolitikar.

– Og så var det utruleg kjekt at vi klarte å samla så mange hyggelege Venstre-folk på ein strålande fredag midt i ferien, synest Glenn Erik Haugland.

Spennande? Vil du ha ukas høgdepunkt i innboksen?

Les meir om

Bli medlem du også!

Di støtte gir liv til lokalavisa vår.

  • Tilgang til alt innhald
  • Utan bindingstid
  • Fra 36 kr/uke
Se priser

Abonnementet blir fornya kvar måned. Du kan seia opp kor tid du vil, og blir då ikkje belasta for neste periode.