In Memory of Elvis Gospel med Fonos

Sånn høyres Fonos ut med 3 x Elvis

Vidar Busk, Paal Flaata og Stephen Ackles hylla Elvis i gospel-stil med Fonos.

Av: Kjetil Vasby Bruarøy

I desember 2017 gjekk dei tre musikarane Vidar Busk, Paal Flaata og Stephen Ackles opp kyrkjegolvet i Uranienborg for å synga gospel saman for første gong.

I går spelte dei sin nest siste av 140. konsert på turneen In Memory of Elvis Gospel.

– Elvis spelte inn nesten 80 gospel-låtar, eigne og andre sine låtar, og det var i denne sjangeren han fekk sine einaste Grammy's, fortalte Stehpen Ackles tidleg i konserten.

Orkesteret var på ti mann, inkludert dei tre frontfigurane, tre syngande blåsarar, ein velplassert trommeslagat og ein ruvande kontrabass.

Rekord i «amen»?

Det svinga frå første tone, sjølv om nærmast ingen av låtane, vil vi tru, er kjent for gemene hop.

Busk, Flaata og Ackles er ulike vokalistar, men alle liknar Elvis på sitt vis. Sjølv om Ackles meinte kyrkja var kald, blei dei fort varme i trøya.

Særleg Vidar Busk, som med heftige gitarsoloar og enorm energi var ein bærebjelke gjennom det nesten to timar lange gospelprogrammet.

Allereie på ein av dei fire-fem første låtane fekk han kyrja, som såg ut til å vera tre kvart full, med seg på allsong. Vi vil tru det er nokre tiår sidan så mange har sagt «amen» så mange gongar synkront i Os kyrkje. På amerikansk, rett nok.

Ei veke før Fonos-konsertane

Nærmast alle dei 140 konsertane har vore i kyrkjer rundtom i landet. I kveld avsluttar dei i Åsane kirke.

På kvar stad dei har vore, har Elvis-kopiane hatt med seg lokale kor på dei siste låtane. I Os var det Fonos som blei kontakta.

– Eg tenkte med det same at det kunne vera kult, og sendte ut melding til kormedlemmane og spurde om dei hadde lyst, seier dirigent Stine Kobbeltvedt.

Koret sa ja, og fekk ein noko meir travel haust enn vanleg. Fonos skal ha to julekonsertar i Oseana søndag om ei veke, og måtte setja av nokre ekstra kveldar til å øva inn gospel frå Elvis sitt repertoar.

– Det var periodar eg tenkte «kva har vi takka ja til?», men dette var heldivis nokre av dei låtane vi hadde høyrd før, og øvinga gjekk greit.

– Og vi angrar ikkje, dette var ei veldig fin oppleving for oss! seier Stine.

– Er det henta inn noko Elvis til julekonsertane neste helg?

– Vi hadde jo ein litt amerikansk julekonsert i fjor, i år tar vi det litt nedpå. Men det var så gøy at det er mogleg at vi hentar ut ein og annan Elvis-solist frå eigne rekkjer og tar det med i programmet.

 

 

Fleire saker