Bustaden er framleis stengt av etter brannen torsdag. Huseigarane seier det ikkje manglar på tilbod om overnattingsstad. (Foto: Kjetil Vasby Bruarøy)

Sånn opplevde dei brannen

Måtte droppa sydenturen då nyoppussa hus tok fyr.

Av: Kjetil Vasby Bruarøy

To personar, ei kvinne og hennar vaksne son, berga seg torsdag ut av eit røykfylt hus i Kuventrævegen.

Kvinna blei frakta til Haukeland for sjekk, og blei skriven ut fredag. Bustaden er framleis stengt av, og det er ikkje kjent korleis brannen starta.

Mange tankar

Kvinna og sonen gjorde seg torsdag klar til å reisa til Spania saman med guten si storesøster, som bur ein annan stad. Vi har snakka med kvinna sin sambuar, som var på Austlandet.

– Eg hadde få dagar igjen av ferien, så eg tok meg ein tur til Mjøsa sidan dei skulle ha ei veke til med ferie.

Han hadde vore vekke i eitt døgn då han fekk beskjed om at det hadde vore brann i huset.

– Mange tankar gjekk gjennom hovudet på veg heim til Os. Eg er først og fremst glad for at sambuaren min og sonen kom seg raskt ut. Og for at brannen ikkje starta om natta eller sju timar seinare. Då hadde huset stått tomt, men katten, som svigerinna mi skulle sleppa ut om kveldane, hadde nok vore inne.

Sofaen er smelta

Paret kjøpte huset for fire år sidan, og var nyleg ferdig med fleire omgangar med oppussing, frå drenering rundt huset til innreiing av kjellarleilegheit og skifte av kjøkken.

– No veit vi ikkje kor store skadar huset har fått, men vi ser gjennom glaset at sofaen er smelta. 

– Brannvesenet seier at røyken i huset har hatt ein temperatur på 800 gradar. I så fall er det nok mykje som er forkulla i fleire rom.

Kjente svilukt mens han støvsugde

Mens huseigarane bur i hovudetasjen har sonen ein leilegheit for seg sjølv i kjellaren. Det var han som oppdaga brannen.

– Han kjente svilukt mens han støvsugde. Først trudde han det lukta fordi støvsugaren er ny, men så opna han døra der svilukta kom frå.

– Han såg røyk og flammar, lukka døra, varsla mora i etasjen over og kom seg ut.

Så byrja det å pipa i alle røykvarslarane i huset, både dei tre frå vaktselskapet og dei mange utanom, som er kopla med trådlaus synkronisering. Kvinna prøvde å sløkka med pulverapparat. Men flammar og varm røyk slo imot ho, og ho valte å evakuera.

– Vi har inga formeining om korleis eller kvifor brannen starta. Det er ingen elektriske apparat, ikkje ein gong varmekablar eller sikringsskap, i rommet der flammane og røyken kom frå.

Venar og familie stiller opp

Huseigarane roser både vaktselskap og nødetatane for rask og god respons. Forsikringsselskapet har allereie betalt erstatning for flybillettane til Spania.

– Vi har fått låna foreldra mine sin bustad. No om dagen er vi ute og handlar nye klede. 

– Venar, familie og andre som kjenner oss har verkeleg stilt opp! Vi har fått rikeleg med tilbod om overnattingsstadar og andre formar for hjelp, og føler oss slett ikkje åleine i situasjonen vi dessverre har hamna i, seier sambuaren.

– No håper vi at bilde, måleri og ting vi har arva ikkje er gått tapt. Samtidig som vi gler oss over at alle kom uskadd frå brannen.

Fleire saker