Sanner vitjar gründerparken

Tysdag ettermiddag kjem statsråden til Os for å vitja Bjørnefjorden Gründerpark. Vitjinga er ein del av eit to-dagars besøk på Vestlandet kor smart bruk av teknologi, gründerskap, sosialt entreprenørskap og omstilling er tema.

– Skal vi lukkast med å styrke verksemdene vi har i dag og skape nye arbeidsplassar må Noreg vere i front på teknologiutvikling og bruk av teknologi. No skal eg møte og lære av gode gründerar og innovatørar på Vestlandet, seier kommunal- og moderniseringsminister Jan Tore Sanner i ei pressemelding.

I tillegg til vitjinga hos Bjørnefjorden Gründerpark skal Sanner vitja The Impact Hub i Bergen, Makerspace i nyskapningsparken i Bergen, PS Bryggekafe på Kråko på Fitjar, Kværner Stord og The Switch på Stord. Han deltek òg med innlegg om digitalisering og omstilling i Noreg på NHH sin vårkonferanse.