Satsar på livleg, ung og «stille» jul

Lista for november og desember er tettpakka hos Catten Nightclub.

Ved sidan av dei faste innslaga, quiz om torsdagen, brettspel og bordtennis fredag og dj og pianobar om laurdagen, blir det fleire arrangement mot eit vidt spekter av målgrupper.

– Vi har høyrd mykje bra om Olavs julejam, Olav Skorpen sitt arrangement som tidlegare var fast innslag på andre utestadar i Os vesle julaftan, fortel Bjarte Andersen.

Veslejulaftan i år køyrer Catten jam med Olav for første gong, og Skorpen har med seg kameraten Eirik Søfteland til å bidra både på og av scenen.

Over og under 18

Julaftan er på ein laurdag i år og 1. juledag er, tradisjon tru, venta å bli årets beste utelivsdag på Os.

Men delar av romjula er hos Catten sett av for ungdomen i Os.

– Andre juledag har vi 18-årsgrense og vi kjem til å setja ei øvre aldersgrense, fortel Marte Haugsdal og Mai-Brit Grimen.

Catten prøver seg òg mot ei heilt ny målgruppe; ungdom frå 15 til 18 år.

– Vi har aldri hatt ungdomsfest for dei under 18 år før, med unntak av lukka lag for nokre fotballspelarar på 14-15 år, som var svært vellykka.

Tredje juledag blir det ungdomsfest for dei frå 15 til 18 år, og det blir ikkje siste gong.

– Vi har oppretta ei eigen Facebook-gruppe for Catten 15-18, og vil prøva å få eit program utover 2017 for fleire discokveldar for dei under 18 år.

Livemusikk, standup og silent disco

Utanom pianobar har Catten fleire kveldar med livemusikk på programmet.

Siste helga før jul speler Undercover fredagen og Decks & Drums laurdagen.

Før den tid, førstkomande fredag, er det standup med André Ulveseter, så kjem eit heilt nytt konsept til Os; Silent disco.

– Vi fekk nettopp stadfesta at vi får Silent Disco til Os. Her kjem fleire DJ-ar med medbragt hodetelefoner, der festdeltakarane får kvar sine sett der dei kan skifta kanal.

– Eit lys på hodetelefonane viser kva kanal dei høyrer på, så det er ikkje alle som dansar i same takt. Det er morosamt og det er veldig populært i Bergen, så vi er spente på mottakinga her i Os, seier Bjarte om arrangementet som går over to kvelder siste helga i november.

Vil du lesa meir om silent disco? Sjekk denne artikkelen på studvest.no, «Lyden av stillhet».