Halve brua, over og under, er kledd i stillas. Eit fint skue på dagtid, men ikkje lett å få auge på om natta. (Foto: Christian Holko)
Halve brua, over og under, er kledd i stillas. Eit fint skue på dagtid, men ikkje lett å få auge på om natta. (Foto: Christian Holko)

Seglbåt tok oppi stillas under Strønebrua

Manglar lys etter redusert seglehøgde.

Kjetil Vasby Bruarøy
30. juli 2019 - 16:04

Klokka 23.45 måndag kveld kom Terje Boge seglande inn frå Krossfjorden mot Os Seilforening si hamn i Kvernevika på Strøno.

– Eg har hatt same båt i ni år, ein Bavaria 32 med masthøgde på 14,55 meter. Strønebrua har fri seglehøgde på 15 meter, og eg har alltid gått under, fortel Boge.

Han sto som vanleg på framdekket og gjorde klar fenderane då han i halvmørket oppdaga at halve Strønebrua var kledd i stillas, eit stillas som òg stikk under brua.

• Les òg: Strønebrua skal rustast opp

– Eg gjekk litt babord for midten av brua, hadde eg gått nærmare Strøno så hadde det ikkje vore noko problem.

I staden fekk Terje det travelt, tok roret og fekk lagt seglbåten over så den krenga, noko som gjorde at masthøgda blei om lag ein halv meter lågare i forhold til havskorpa.

– Men i det eg retta den opp igjen så tok antennefisken oppi stillaset. Heldigvis kom båten unna utan skadar. Hadde masta tatt oppi så kunne skaden ha forplanta seg til både hytte og skrog.

Har varsla

Boge ringte byggherre, Statens vegvesen. Han har òg sjekka med Kystverket og NavTech, og ingen av desse såg ut til å vera varsla.

– Eg har sjølv kontakta utførande entreprenør, som skulle sjekka med sine underleverandørar, fortel byggeleiar Jan Ove Nygård frå Statens vegvesen.

Hovudentreprenør er Uniprotect AS i Strandvik.

– Vi har sjekka med vår underleverandør på stillast, Pilot, og dei skal ha varsla Kystverket i god tid. At ikkje det er lys på stillaset under brua beklager dei på det sterkaste. Dette blir tatt tak i med éin gong, seier Bjørnar Vik hos Uniprotect.

OPPDATERT: Uniprotect sin stillasleverandør stadfestar at det kjem lys på stillaset under brua i kveld.

Arbeid med rigging av stillas vil halda fram ut veka. Over helga startar Uniprotect med overflatebehandling, eit vêravhengig arbeid som vil vara nokre månadar.

Seglar Terje Boge har spreidd bodskapen om lågare seglehøgde internt i Os Seilforening, og håper mangelen på lys og eventuell varsling og skilting blir gjennomført snarast råd.