Sel 400 vårrullar - på ein dårleg dag

Asia Mat, som opna på Amfisenteret i september 2013, heldt stand gjennom første driftsår.

– Dei første månadane gjekk det akkurat rundt. Vi klarte å betala rekningane, men det gjekk litt tid før det blei butikk av det, fortel Vang Thi Dang.

No står dei ekstra sterkt etter at dei i november kom med eit nytt tilbod; ferske, varme lunsjrettar.

Vårrullar og dagens lunsjrett forsvinn ut disken mens Vang og søsknene koker og steiker ny mat så fort dei kan på kjøkkenet på bakrommet.

I desember auka omsetnaden med over 60 prosent.

Fersk og heimelaga

Vang fortel at dei har mange kundar med asiatisk bakgrunn, men at dei fleste er etnisk norske.

– Det har blitt endå fleire norske etter at vi byrja med varm mat, og vi held ikkje oppskriftene hemmelege.

– Alt vi lager kan folk få oppskrift på hos oss, råvarene har vi i butikken. Vi har godt sal av alle varegrupper og prøver å hjelpa kundane til å læra seg nye rettar, og å velja dei rette varene.

Fekk god hjelp av kommunen

Å få utstyr og løyve til å laga varm mat var noko krevjande, men Thi Dang synest prosessen var effektiv og god.

– Os kommune var veldig imøtekomande og gav oss god rettleiing og hjelp.

– Det var spennande å investera i dette, men godt å få all godkjenning på plass og å få sånn respons på tilbodet.