– Friele har vore flinke å koma med ne variantar, men det store volumet er det fleirpakningar med filtermalt som står for, seier kjøpmann Trond Hope. (Foto: Kjetil Vasby Bruarøy)

Sel mest Friele-kaffi i Noreg

Ingen Rema-butikkar, og berre nokre få Obs-varehus, sel meir Friele enn Trond Hope.

Av: Kjetil Vasby Bruarøy

– Tal for første halvår viser at Kuven stasjon har segla opp til toppen av lista, seier Asle Helland i Jacobs Gouwe Egberts.

Helland, som òg er frå Os, er «regional kam» (regionsleiar) i Jacobs Gouwe Egberts, som eig Friele.

– Til no i år har Kuven stasjon handla 10,2 tonn Friele-kaffi. Det er ei auke på 3,7 tonn, opp 56,6 prosent i forhold til i fjor.

Delar avveksta kan forklarast med at Os gjekk frå to til éin butikk i april 2018, men ikkje alt. 

Kuven stasjon er ikkje berre den største Rema-kunden til Friele, dei er på topp 10-lista i Noreg uansett kjede, med utelukkande store Os-varehus over seg.

– Passerer 20 tonn i år

Kjøpmann Trond Hope gler seg over å vera den største Friele-seljaren i Rema-systemet.

– Vi sel mykje kaffi, og har andre merke enn Friele. Men osingane er trufaste drikkarar av spesielt filtermalt frå Friele. Gode prisar på fleirpakningar er det som har slått best an, og vi kjem nok til å passera 20 tonn med Friele i år.

– Samtidig har Friele vore flinke å fornya seg, med kapslar til kaffimaskiner og fleire variantar. Det er med på å skapa vekst.

Søndagssuksess i nytt tilbygg

Ved sidan av at Kuven stasjon no omset for meir enn dei to Rema-butikkane gjorde til saman, opna dei søndagsbutikk i pinsehelga.

– Både omsetnad og drift har vore vellykka. Vi har passert volumet til Askøy og er på tilsvarande nivå som Noregs største søndagsopne Rema 1000, på Skjold, var i fjor, fortel Hope.

– Vi synest kundestraumen er god, men ser allereie på korleis vi kan utvida kapasiteten i kassane. Snittet per kunde er høg, sjølv om det er søndagshandel, då er det greit å kunna ta unna så fort som mogleg.

Fleire saker