Heine, Christoffer og Fonos sel godt, til saman 70 i går åleine.
Heine, Christoffer og Fonos sel godt, til saman 70 i går åleine.

Selde 70 billettar på éin dag

Junirekord i Oseana.

Kjetil Vasby Bruarøy
26. juni 2020 - 14:12

Oseana sitt første sommarprogram sidan starten i 2011 har slått godt an.

Eirik Søfteland, som kjem tilbake neste helg, fylte Griegsamlinga i fire rundar, og korpsa hadde godt publikum førre helg.

No står humor, trekkspel og korsong for tur, standup med Christoffer Schjelderup i kveld, konsert i Griegsamlinga med Heine Bugge laurdag formiddag og Fonos i Oseanasalen søndag kveld.

– Vi selde 70 billettar i går åleine, og det berre til dei tre arrangementa i helga.

– Eg trur det er junirekord i mengde selde billettar på éin dag, fortel leiar for marknad og kommunikasjon, Veronica S. Halhjem.

Ingen morgonfuglar?

Det er i skrivande stund berre 32 billettar igjen til standup i kveld, mens det er noko ledig òg til Heine Bugge i morgon formiddag.

– Vi hadde tenkt at Heine kunne vera ein frisk start på dagen, og sette opp konsert klokka 9.30, men vi overvurderte tydelegvis mengda morgonfuglar til denne konserten, seier Veronica.

Konserten blei flytta til 11.30, og fleire kjøpte.

– Heine er ein av dei i sommar eg gler meg mest til, seier programsjef Berit Steen.

Bugge er del av jodleduoen Polkabjørn og Kleine Heine, som blant anna spelte på opninga av Oseana i 2011, og opninga av eit seniortreff i 2014 (sjå video).

Eksklusivt, fagleg påfyll

I neste veke står kunstsamtale med Arne Mæland, konsert med Eirik Søfteland og yoga i kunsten på plakaten, så blir det pause fram til Bjarte Hjelmeland skal synga country i slutten av juli.

– Yoga blir denne gong med kunstsamtale med kurator Evelyn Holm, for dei som ønskjer det. Deltakarane blir ofte gåande å sjå litt på utstillinga etter yogaen, denne gong blir det eksklusivt med litt fagleg påfyll om ulike verk.

 

Les meir om

Kultur Musikk Oseana Scene