Sette ny banerekord – igjen

Bjørnefjorden Golfklubb, som for rundt fem år sidan blei oppjustert til par 68, fekk 1. august ny offisiell banerekord.

Alexander Heggland gjekk banen på 66 slag, eitt slag betre enn førre banerekord, som også var Heggland sin.

Tidleg teikn på god runde

– Når du går hol to, som er par 5-bane, på 2 slag, så ligg det an til å bli ein god runde, fortel Alexander om rekordrunden.

Det var nettopp hol 2 som var største endring under ombygginga som førte til oppjustert par for banen. Holet var par 4 på den eine runden og par 3 på den andre før ombygginga.

No er hol 2 par 5 på begge rundane på 9-holsbanen på Hauge.

Satsar på å slå eigen rekord

Om ei god veke er det klubbmeisterskap på Bjørnefjorden Golfklubb.

I fjor vann Heggland med 10 slag. Men han går ikkje berre for å forsvara tittelen.

– Det finnest nokre uoffisielle rekordar eg ønskjer å tangera eller slå.

Den uoffisielle rekorden er på 65 slag, 3 under par.

– Kven som har den uoffisielle rekorden?

– Det er meg det òg, smiler Alexander.

– Mange gode rundar i år

Dagleg leiar ved Bjørnefjorden Golfklubb, Eivind Hodneland, skryter av Alexander – og av banen.

– Alexander har spelt veldig bra i heile år. Og vi har mange som har gått gode rundar her oppe.

Hodneland trur årsakene kan vera fleire, ikkje minst vedlikehaldet på banen.

– Det har skjedd mykje bra over tid, i tillegg er banen veldig godt vedlikehalde i år. Det er sånn at eg kan sjå på bilde frå banen tatt i fjor og sjå på bildet at dette umogleg kan vera tatt i år.

– Vi får også veldig fine tilbakemeldingar frå gjestar, folk frå andre klubbar, og fleire av dei har sagt at dei no vil melda seg inn hos oss og heller reisa til Os og spela golf.

Les òg: 11 under par!(då Øystein Engevik sette banerekord på Drøbak i 2010)