Siger etter sju år

– Keeperen var den store forskellen i år, at vi fekk med oss Kjetil Kvåle var nok avgjerande, seier TG16-spelar Remi Reiertsen.

TG16 har gjort det bra i gatecupen Tysnes Sparebank Cup også tidlegare. I fjor kom dei til semifinalen, der dei tapte mot Sjøfarerne, dei same som dei slo i finalen i år.

–Forskjellen er at i år så var buret tetta fullstendig igjen, Kvåle sleppte ikkje inn eitt mål.

39-0 på 8 kampar

TG16 sto med 22-0 i målforskjell på dei første tre innleiande kampane, den fjerde enda 0-0.

I sluttspelet gjekk det nesten like bra, 5-0 i 1/8-finalen, 2-0 i kvartfinalen, 7-0 (!) i semifinalen og 3-0 i finalen.

– Den kjekkaste kampen var kvartfinalen, der møtte vi Jarle Mjånes og andre osingar på laget Nesten Oldboys.

– Kva står TG16 for?

– Det første året vi var med så budde tre av spelarane på laget i kollektiv i Teatergaten 16 i Bergen, forklarer Remi.

Ingen aktive

Dei fem første av dei sju åra TG16 har deltatt på Tysnes Cup stilte dei i klassen lettbeinte menn. Her er det lov å ha med to aktive spelarar, noko TG16 ikkje hadde.

– Vi tok oss likevel til kvartfinalen i den hardaste klassen det eine året, men vi høyrer heime blant sårbeinte menn, som klassen for amatørar heiter.

I tillegg til desse herreklassane har cupen eigen klasse for dei over 40 år. Ja, du har rett, den klassen heiter stivbeinte menn.

Halhjem klarte nesten å forsvara tittelen

I klassen lettbeinte menn stakk eit anna lag frå Os i fjor av med sigeren. Espen Halhjem og Os-kaptein Stian Lunde var blant spelarane på laget som hadde det klysete, men kledelege namnet Vinnarane av Tysnes Sparebank Cup 2010.

I år stilte dei med namnet Vi som vant i fjor. Dei kom til semifinalen, der dei spelte 1-1, men rauk ut på straffe (4-2) for FC Gizmo, som gjekk til finalen og vann klassen.

Både Espen Halhjem og Remi Reiertsen er kjente ansikt frå MidtsidenCup på Os, som blir arrangert på Kuventræ i oktober kvart år.

Sjå samleside: MidtsidenCup

Ekstern lenkje: Tysnes Sparebank Cup