Signerte playmaker frå Fana

Lysekloster har signert keeper Mikal Brekke frå Os si ungdomsavdeling og midtbanespelar Espen Birkeland frå 2. divisjonsklubben Fana.

– Her har vi fått ein tredjekeeper, som vi var på jakt etter, og ein rutinert playmaker med god erfaring frå høgare nivå, seier trenar Ørjan Sandal.

Årets spelar

Espen Birkeland frå Smørås har spelt dei siste fire sesongane på Fana, der han i 2013 blei kåra til årets spelar og i 2014 heldt fram med å vera blant dei mest sentrale og fast frå start i 2. divisjon.

Førstedivisjonsklubben Åsane skal ha vist interesse for 26-åringen, men i går valte han å gå til Lysekloster i 3. divisjon.

– Eg har hatt det fint i Fana, men ville prøva noko nytt. Det var kjekt å vera på trening med Åsane, og dei viste interesse. Men det skal passa òg, både med tidsbruk og reiseveg, seier Espen, som no tar turen over Fanafjellet.

Signerte etter andre trening

Birkeland var på trening med Lysekloster for eit par veker sidan, blei sjuk, men var i går tilbake på banen. Etter treninga signerte han kontrakten.

– Eg har fått eit godt inntrykk av både nivået og ambisjonane til klubben og kjenner fleire av spelarane frå før, fortel den nysignerte Lysekloster-spelaren.

Sandal er svært nøgd med nyervervinga.

– Han kjem til å passa godt inn i gruppa, både som spelar og som type. No har vi hatt ein del utskifting, med cirka 14 ut og 10 nye inn, så utfordringa framover blir å få det nye laget til å setja seg til NM-kvalik og seriestart, seier Lysekloster-trenaren.