Simen opna målkontoen

Brann 2 har vunne to av dei tre første kampane etter ferien og klatra i går til 3. plass på tabellen etter 2-0-siger over Viking 2.

Brann stilte med eit juniorlag, Viking stilte med åtte frå A-stallen.

– Simen Lassen dominerte midtbanen, skriv brann.no etter kampen.

Det sto 0-0 til pause, men osingen Simen Helland Lassen, som spelte frå start og heile kampen, gav Brann leiinga i 63. minutt.

– Skåringa kom på corner, eg heada den inn på første stolpe, seier Simen til Midtsiden.

– Det var veldig kjekt å skåra, spesielt sidan det blei eit ganske viktig mål.

Viking 2 pressa på for å få utlikning, men Kjetil Kalve auka leiinga i 79. minutt og Brann 2 vann bortekampen 2-0.

Mykje speletid

Brann 2 har i dei to andre kampane etter ferien tapt 4-3 borte for serieleiar Vindbjart og vunne heile 6-1 over Arna-Bjørnar på Stadion.

Brann 2 ligg no på 3. plass på tabellen, 7 poeng bak Nest-Sotra og 8 poeng bak Vindbjart.

Simen spelte heile kampen mot Vindbjart og kom innpå for Kjetil Kalve i 46. minutt mot Arna-Bjørnar.

Osingen Fredrik Heggland har frå starten på sesongen fått mykje speletid i 2. divisjon, og nærmast vore på banen kvart speleminutt denne sesongen.

– Fredrik har ein unik eksplosivitet. Midtstopparar med Fredrik sine eigenskapar er noko som norsk toppfotball skriker etter, sa Brann 2-trenar Helge Nilsen til Midtsiden i juni.

I går fekk han gult kort og må sona karantene i neste kamp.

Med håp om Tippeliga-debut

Simen Lassen fekk i vinter sin debut på A-laget til Brann då dei slo Hovding 14-0 i NM.

Men verken han eller Fredrik har fått smaka på Tippeligaen enno.

– Det er no to ledige plassar i femmargruppa, gruppa med spelarar utan proffkontrakt som A-laget kan bruka i Tippeligaen.

Ein av Lassen sine konkurrentar om midtbaneplassen på Brann 2, Lars Kallevik, har gått til Fyllingsdalen. Kallevik hadde ein av desse fem plassane.

– Uttaket til dei ledige plassane blir nok tatt no på seinsommaren. Eg føler eg har gjort det greit i det siste og har veldig lyst å koma inn i denne gruppa, seier Simen.

– Får mykje skryt

Osing og tidlegare Os-spelar Ørjan Håland, som jobbar for Brann-TV, seier han høyrer mykje bra om dei to unge osingane.

– Dette har nok vore eit veldig lærerikt halvår for begge to, med så mykje matching mot lag som kjempar om opprykk til Adeccoligaen.

– Fredrik er ekstrem og har vore fast som midtstoppar. Han er stor og sterk for alderen og truleg den raskaste forsvarsspelaren som er i klubben. Held han fram med den positive utviklinga spelemessig kan denne eksplosiviteten vera det som gjer han ekstra attraktiv på høgare nivå.

– Eg får også veldig fine tilbakemeldingar på Simen. Han var veldig god den omgangen han spelte mot Arna-Bjørnar og i går var det visst sinnsjukt kor han dominerte mot fleire spelarar frå Viking sin A-stall, seier Håland.