Sir Frank Chapman på Lepsøy med SY Clare liggande på svai nedanfor fritidsbustaden. (Foto: Kjetil Vasby Bruarøy)

Sir Chapman i Os med SY «Clare»

– Dette er ein stad eg verkeleg kan slappa av, seier den tidlegare BG Group-direktøren.

image
image
image
image
image
Av: Kjetil Vasby Bruarøy

Måndag kom britiske sir Frank Chapman til Os og Øyane med si praktfulle seglskute, SY «Clare», ein 88,6 fot (86 norske fot) lang Oyster 885.

– Dette er Oyster 885-03, altså den tredje båten dei lagde av denne typen. Dei har laga åtte no, fortel Chapman mens han står på terrassen utanfor fritidsbustaden sin ved Blindasundet på Lepsøy.

• Les meir om Oyster 885 på oysteryachts.com

Nedanfor køyrer andre båtar sakte forbi, der fire år gamle «Clare» ligg på svai utanfor inngangen til Hauglandssjøen. Fleire tar bilde av den 27 meter lange og 8 meter breie seglskuta, med mast som står 39,6 meter over havskorpa.

– Tidlegare hadde eg ein Oyster 66, som eg segla over her frå England fem-seks gongar. Då fekk eg den lokale arbeidsbåten Samba til å legga ut eit lodd. Men «Clare» veg 80 tonn, så då måtte vi ha eit større lodd. Det førre blei naturlegvis fjerna, for miljøomsyn, no ligg det eit lodd på 80 tonn på botnen.

I Noreg for å bygga Troll

Chapman seier han stortrivst i Os-skjergarden, og fortel om korleis han fekk dette forholdet til Noreg og Os. Han hadde jobba fire år for BP før han i 1978 blei tilsett i Shell.

– Eg kom til Noreg jula 1990 og var her til 1995, som prosjektleiar under bygginga av Troll-plattforma. Det var ei heilt fantastisk tid! Sett vekk frå det å møta kona mi og det å sjå ungane mine veksa opp, er bygginga av Troll det mest gjevande eg har vore med på, eg ville opplevd kvar dag om igjen, om eg kunne.

I 1995 blei den 656.000 tonn tunge plattforma slept dei 200 kilometerane frå Vats til Trollfeltet for å produsera gass. Troll A blei plassert på feltet 17. mai 1995 og produksjonen starta 9. februar 1996.

Troll A-plattforma blei tildelt arkitekturprisen «Betongtavlen» for 1995 og er kåra til «Århundrets ingeniørbragd» av lesarane til Teknisk Ukeblad (1999).

Fann kjærleiken på jobb

– Eg var nyseparert då eg kom til Noreg i 1990.

Mens han jobba med plattformprosjektet møtte han Kari Elin Theodorsen, som i dag er kona hans, og som har familie i Bergen og Os.

– Vi møttest på jobb. Ni månadar etter at prosjektet var ferdig gifta vi oss. Bryllaupsfesten var på Solstrand. No har vi vore lykkeleg gift i over 20 år!

Frank og Kari har mange å besøka i Os og Bergen. Derfor såg dei etter ein fritidsbustad i området.

Lyden av heilt stille

Dei blei tipsa om prosjektet som skulle byggast på Riddarhaugen på Lepøsy, på eigedomen der det tidlegare var feriesenter for blinde og svaksynte.

– Vi var dei første som kjøpte og flytta inn. Eg hugsar eg var på inspeksjon kort tid før innflytting, og eg sto inne i stova og kunne høyra ein veps fly forbi på utsida. Det var heilt magisk!

– Berre to andre stadar i verda har eg opplevd liknande. Det var i utmarka i Australia og i Jaipur i India. Men der var lyden av innsekt også det einaste du høyrde, seier Chapman og ler.

– No har det kome fleire hus og fleire naboar, men det synest vi berre er kjekt! Det er framleis den rolege atmosfæren her, og dei strålande omgjevnadane.

Seglar til Lofoten med familien

I pinsen går turen frå Lepsøy og nordover. Chapman har med seg familie frå England, Bergen og Os, når han reiser mot Lofoten og Bodø.

– Dei om bord har ulik erfaring frå segling, men eg kallar alle mannskap, og alle skal få oppgåver. Hovudfokus er likevel at vi skal ha ein komfortabel tur, at alle skal lika å segla.

Sjølv fekk han smaken på segling då han frå 1981 til 1985 var på jobb for Shell på Borneo, i den malaysiske provinsen Sarawak nord på øya.

– Eg lærde meg å segla 470-klassen (dinghy), og likte det utruleg godt!

Seinare har det blitt både cruising og større regatta - i langt større båtar.

Chapman har både kryssa Atlanteren og segla jorda rundt i regatta, blant anna med den kjente skotske eventyraren, sir Chay Blyth, som starta regattaen Global Challange, og som i 1971 var første mann i verda til å segla single-handed rundt jorda, i eitt strekk, retning vest (mot vindane).

Tidleg på 2000-talet segla han to av seks legg med BG Spirit i World Challange, ein transatlantisk regatta.

– Det var via Rolls-Royce, som vi var saman med på eit prosjekt, og det var utruleg kjekt for både dei tilsette i selskapa våre, som følge racet, og for oss som var med. Det blei ekstra stas då vi stakk av med førsteplassen! seier Chapman.

– Eg gløymer ikkje at eg har vore heldig

I 1996 gjekk Chapman frå Shell til BG Group som Managing Director of Exploration and Production.

I 2000 blei han Chief Executive i BG Group, ei stilling han hadde fram til han trappa ned i 2012 og jobba som rådgjevar til han pensjonerte seg i juni 2013.

Då hadde obligasjonane hans meir enn tidobla seg i verdi, og han fekk endå større økonomisk fridom enn før.

– Eg har vore veldig heldig. Eg er audmjuk ovanfor dette, og eg trur alle som har hatt flaks eller suksess er klar over at alt kunne sett veldig annleis ut.

I 2011 blei Chapman slått til ridder og fekk tittelen «sir» for si teneste for olje- og gassindustrien.

No ser han fram til sin første seglas til Nord-Norge.

– Søndag kveld har vi crew dinner på Enhjørningen i Bergen, klokka 6 måndag morgon legg vi frå land. Turen går først til Geiranger, men vi skal òg innom Ålesund, seier Chapman, som har ei «non executive» rolle i Rolls-Royce, og har lovd å svinga innom og visa båten og ta ein middag.

Når dei kjem sørover igjen blir det eit par dagar på Lepsøy før Frank seglar båten heim til England. Seinare i sommar ventar fleire seglas, også deltaking i regatta.

Fleire saker