- Sjekk fakta, Sandal

- Vi har 76-24 i målforskjell på 7 kampar og møter gjerne Lysekloster til treningskamp, seier oldboys-keeper Vidar Hjelle.

Kjetil Vasby Bruarøyonsdag 30. juni 2010 10:27

Skrytelista Lysekloster-trenaren la fram i dag har ikkje gått Os sitt oldboyslag hus forbi.

- Ørjan Sandal seier Lysekloster er einaste lag i Hordaland som har skåra over 50 mål før sommaren. Medan dei har 52-14 på 9 kampar har vi 76-24 på 7 kampar, fortel Vidar Hjelle.

Os sitt oldboyslag har vore suverene i fleire år, og starta årets serie med 21-3-siger over Ask. For to år sidan blei serien redusert frå 11-ar til 7-arfotball, og fleire oldboyslag har skåra over 50 mål til no.

- Det betyr lite at vi speler 7-ar, Sandal påstår at dei har skåra mest uansett nivå. Vi har ikkje tapt sidan Kniksen spelte på Brann, seier Hjelle, og veit at han set seg sjølv i Sandal-standard når det gjeld faktasjekk.

For eit og anna tap skal ha blitt fortrengt i stallen av gamle Os-spelarar.

- Vi møter gjerne Lysekloster til treningskamp i sommar, så kan vi sjå kven som skårar mest.

- Skulle ikkje haustsesongen deira bli så god kan dei dessutan låna ein krinsmeister-pin av oss. Det er berre til å ringa Rolf Matre. Dei siste åra har han ikkje fått igjen hanskerommet på bilen sin fordi det har vore så fullt av medaljar, ler Vidar.