Sjekka tungtransport og russebilar

Russebilar på veg til Landstreff Stavanger blei kontrollert av Statens vegvesen før dei fekk køyra på ferja fredag ettermiddag kveld.

Vegvesenet hadde kontroll både på Halhjem og i Hjellemarka, og sjekka òg køyre- og kviletid, kabotasje og generell trafikktryggleik.

– Vi har ingenting å melda om russen, seier John Kåre Larsen i sin rapport frå kontrollen.

Men på tungtrafikken var det eitt og anna å utsetja.

To av fire som blei sjekka for køyre- og kviletid fekk skriftleg åtvaring, tre fekk bruksforbod fordi det sto gjenstandar i siktlinja i førarhuset og éin blei avskilta grunna manglande periodisk kontroll.

Ein annan fekk gebyr for manglande vognkort, og fekk bruksforbod fordi køyretøyet er utanlandsk.

Det blei skrive ut tre tekniske manglar, to på lys og éin på dekk og felg.