Skaathun styrkar laget sitt
Skaathun Bilverksted aukar satsinga på bruktbil og har fått med seg ringreven Arvid Mjånes, som har 38 års fartstid hos Jæger.
Bildeserie:
Skaathun Bilverksted AS har utvida og bruker no heile hallen i Kolskogheiane sjølv. Ein telefon frå Arvid Mjånes fekk dessutan innehavar Ole Viggo Skaathun til å koma med ei ny satsing.
– Vi har selt 10-12 bruktbilar i året utan å annonsera det nokon stad. Men då Arvid ringte var det berre å gripa sjansen og gå for ei utviding.
38 år med sal av bil
Arvid Mjånes har jobba med sal av Toyota, Lexus og BMW i 38 år. Han starta med å selja brukte lastebilar og varebilar og har seinare vore salssjef for både nye og brukte bilar hos Jæger i Bergen.
– Ein periode eg var litt lei av å pendla til by'n og av å jobba laurdagar tok eg eit par telefonar til folk i bilbransjen i Os. Ole Viggo var ikkje sein med å ringa opp igjen, fortel Arvid.
Tre bein å stå på
Skaathun er stor på både mekanisk og karrosseri, der han også har plass til å lakkera bussar og lastebilar.
– Med auka satsing på bruktbil blir det endå meir komplett. Eg kom i gang rett etter ferien. Nett no har vi fire bilar ståande, men vi vil ut og kjøpa inn fleire.
– Vi skal ha bilar til både ungdom, far og mor, i hovudsak frå 50.000 til 200.000 i prisklasse.
Den viktige servicen
Det er ikkje berre kundepleie Arvid er opptatt av etter nesten 40 år i bransjen.
– Bilane skal også ha service, og serviceheftet er saman med tilstandsrapporten viktige dokument når vi skal ta inn bilar.
– Folk skal vera trygge også når dei kjøper bruktbil. Serviceheftet er ein viktig ting å sjekka, har førre eigar slurva kan det dukka opp overraskingar du ikkje set pris på.
Skaathun, Mjånes og Wold driv no med planlegging og ommøblering inne og ute, for å få mest mogleg effektiv utnytting av bilsenteret i Industrivegen. Til helga skal dei dessutan ut og visa seg på Osmessa med utstilling.