Skadde foten i ulykke med gravemaskin

Klokka 13.10 kom det melding via AMK om arbeidsuhell i Åsen.

– Først fekk vi melding om at ein person hamna i klem under ei gravemaskin, så fekk vi melding om at han hadde kome seg laus, fortel politioverbetjent Audun Hadler-Olsen.

Vedkomande, ein 18 år gamal gut, var bevisst då politi og ambulanse kom fram.

Ulykka skjedde under bygging av anleggsveg til Endelausmarka i samband med bygging av E39 Svegatjørn-Moberg.

Les òg: Den første vegen

– Guten blir undersøkt av ambulansepersonell på staden. Det er førebels uvisst kor omfattande skadene er og kva som var årsak til ulykka.

Saka blir etterforska vidare og Arbeidstilsynet blir rutinemessig varsla om episoden.

– Ser alvorleg på saka

Det er Vassbakk og Stol som er leverandør for Veidekke på anleggsvegen.

– Eg har ikkje fått alle detaljar enno. Guten er på veg til sjukehus og er ikkje livstrugande skadd, seier administrerande direktør Inge Jan Thorsen til Midtsiden.

Han seier firmaet tar ulykka på alvor og vil setja ned ei gruppe som skal gå grundig gjennom kva som har skjedd.

– Men først handlar det om å ta godt vare på den skadde. Det er heldigvis lengde sidan vi har hatt alvorlege ulykker, men det er trist og alvorleg når det skjer.