Skal 14 personar dela 200.000 kroner?

AMFI Os og Os Fotball starta fredag «Julegavehjelp i Bjørnafjorden» på Spleis.

Måndag formiddag var det kome inn 25.200 kroner utanom dei 10.000 kronene Amfisenteret og fotballen legg i potten, og utanom eventuelle firma som har bedt om faktura.

Fristen på Spleis går ut klokka 17 i dag.

I går kom dessutan ordførar Trine Lindborg innom med 150.000 kroner fordelt på 300 gåvekort frå ulike bedrifter i kommunen.

Desse er delar av dei 4000 gåvekorta kommunen har kjøpt som lokalt koronatiltak for næringslivet.

– Eg synest initiativet til AMFI Os og Os Fotball er veldig bra, og kommunen har kjøpt fleire gåvekort enn vi har mottakarar til, så då er det kjekt å gi dei vidare, seier ordførar.

– Har plass til langt fleire gåvemottakarar

Senterleiar Siri Ann Myhren Dalseide og fotballsjef Endre Brenne er glade for at gåvepotten i går gjorde eit tigersprang i storleik.

Måndag var det kome inn berre 14 søknadar.

– Vi treng ikkje å dela ut alle gåvekorta frå kommunen før jul, men no har vi uansett mykje å gå på, seier Siri Ann.

I sum nærmar det seg gåvar verdt 200.000 kroner.

Målet med kampanjen er å hjelpa flest mogleg av dei som i desse dagar går ei økonomisk litt vanskeleg jul i møte - eller folk som vil gi noko ekstra til nokon i denne kategorien.

Einaste måte å finna desse på er at dei sjølv melder seg via konfidensielt søknadsskjema som ligg på Amfisenteret sine heimesider.

• Les meir og be om julegåve frå AMFI og Os Fotball

Kommunen har fått inn 250 av 1.800 mottakarar

Også under Bjørnafjorden kommune sitt juletre ligg det fleire gåver enn kva det foreløpig ser ut til at nissen får delt ut.

I utgangspunktet skulle dei kjøpa 2000 gåvekort, der 1800 gjekk til eigne tilsette og 200 til blant anna næringsrådet sin julekalender og ymse andre.

Men så fekk Frp gjennomslag for å dobla til 4000 gåvekort. Målet var å dela ut 1800 gåvekort til arbeidssøkjarar, sosialhjelpmottakarar og pensjonistar.

Utfordringa er at Nav ikkje kan gi ut lister, eller motta og dela ut desse gåvekortene vidare. Derfor må kommunen, som på AMFI og Os Fotball si løysing, finna mottakarane ved at dei melder seg sjølv.

– Her har vi fått inn rundt 250 søkjarar, og det er bra. Men vi har mange gåvekort å dela ut, anten det skjer til jul eller gjennom vinteren, og håper fleire melder seg. Er det heile familiar så er nok eitt gåvekort litt lite, så vi kan dela ut fleire på ein enkelt søknad, seier Lindborg.

• Les meir og be om gåvekort (500 kroner) frå kommunen