Skal bygga over 100 sentrumsnære hus

Bildeserie:

1 av 4

Mellom Oshaugen og Sveo, 400 meter frå Os ungdomsskule, 800 meter frå rådhuset i Os sentrum, skal Ostunet byggast. 117 bustadar, både einebustadar, rekkehus og leilegheiter, i grensa til Osmarka, ein kilometer frå både Amfisenteret og Os gjestehamn.

– Det er klart vi er spente, det er eit stort prosjekt og det hadde vore kjekt å få ein god start, seier Geir Døsen, dagen før informasjonsmøte i Vognhallen.

– Vi opplever god interesse, nokre interessentar har stått fleire månadar på liste. Men har ikkje gjeve ut noko informasjon på førehand, verken planteikningar eller pris. Den første presentasjonen går til dei som har meldt seg på møtet. Der kjem òg Link Arkitektur og fortel om visjonen for området, og leverandørar av bad og kjøkken, for å visa ulike alternativ.

Solid samarbeidspartnar

Døsen er frå ein familie i bygg- og eigedomsbransjen, men har sjølv sin hovudbakgrunn som gründer innan logistikk. I fjor kjøpte han seg inn i onkelen Bjørn Døsen sitt prosjekt, som seinare gjekk saman med ein stor grunneigar og eigedomsutviklar, Clemens Eiendom AS. Clemens er heileigd av Staten via Opplysningsvesenets fond. «Skape unike verdier, innfri lokale drømmer» er visjonen til Clemens.

– Å ha ein så solid aktør med på laget har prega plan og arkitektur, og gir oss ein robust inngang på prosjektet. Målet er å skapa gode og trygge oppvekstvilkår, med kort gåavstand til både skule, handel og store, fine naturområde, seier Døsen.

Byggetrinna er på kvar si side av dalen ned mot Oselvo. Sjølve dalen blir friareal, og gir kanskje rom for gapahuk eller ein ballbinge på sikt. Det betyr at når alle har flytta inn i dei første husa, kan neste trinn byggast utan å uroa dei som allereie har busett seg i området.

– Alt innan rekkevidde

Det er trioen Clemens Eiendom, BD Eiedomsutvikling Holding AS og Baccus AS som står for planlegging og realisering av prosjektet, mens Privatmegleren Vikøyr & Brandt er engasjert for å ta kundedialog og sal.

– Vi er veldig glade for å ha blitt valt som meklar på dette prosjektet, det blir verkeleg spennande å få vera med på eit så stort og sentralt prosjekt, seier Arild Vikøyr.

– Det er mange år sidan eit bustadområde av denne storleiken, og med alt innan rekkevidde, frå skular og barnehagar til butikk og kollektivtilbod, har vore for sal. I tillegg er det vegg i vegg med fine naturomgjevnadar, som Oselva og Osmarka.

Saman med Block Watne sitt prosjekt i same terreng, kjem det i alt rundt 135 einingar i området. Det er fleire enn Os Sjøfront 1 og 2 til saman, og det einaste sentrumsnære med også einebustadar i utvalet.

10 av 31 er einebustad

Trass storleiken på samarbeidspartnar Clemens, ei viss mengde kjøparar må til før grunnarbeidet startar.

– Men då tar vi òg alt grunnarbeidet, så det blir minst mogleg støy og tungtransport i etterkant.

Første byggetrinn består av 10 einebustadar, 5 rekkehus og 16 leilegheiter. Når dette trinnet er i gang skal Ostunet vidare på trinn to og tre.

– Her er eit vidt spekter, ein draumestad for barnefamiliar, samtidig noko for både etablerarar og godt vaksne, med parkeringshus og heis. Det vil bli ein stad for fleire generasjonar, seier Vikøyr, og håper på fullt hus i Vognhallen.